मेयर शाक्यले मनपरी बनाएका कंक्रिट संरचना भत्काइन्छः उमपेयर खड्गी

१ चैत, काठमाडौं ।  काठमाडौं महानगरपालिकाकी उपमेयर हरिप्रभा खड्गीले मेयर विद्यासुन्दर शाक्यले मनपरी ढंगले वसन्तपुरमा बनाइएका कंक्रिटका संरचना भत्काउन आवश्यक भएको बताएकी छन् । वसन्तपुर डबलीमा बनाइएका संरचनाको मंगलबार अवलोकन गर्दै खड्गीले विश्व सम्पदा सूचीमा सूचिकृत क्षेत्रमा कंक्रिटको संरचना बनाउन दिएर मेयर शाक्यले गलत गरेको बताइन् ।

उनले भनिन्, ‘यो गर्नै हुँदैन । किनभने विश्व सम्पदा सूचीभित्र परेको क्षेत्रमा मनपरी गर्न मिल्दैन, यो हेलचेक्राइँ हो । सम्पदा क्षेत्रमा यसरी कंक्रिटको संरचना बनाउन हुन्छ हुँदैन भनेर विवेक पुर्याउनु पर्ने हो ।’ यसबारे मेयर शाक्यसँग सल्लाह गर्ने उनले बताइन् ।

महानगरको भौतिक पूर्वाधार विभागले डबलीमा क्षति पुग्ने गरी कंक्रिट प्रयोग गरेर आठ वटा झण्डा राख्ने आधारहरु निर्माण गरेको छ । महानगर क्षेत्रभित्र ७० लाख रुपैयाँ खर्च गरेर १२ वटा झण्डा राख्ने निर्णय भए अनुसार वसन्तपुरमा आठ वटा झण्डा राख्ने संरचना बनाइएको हो ।

यसबारे बोर्ड बैठकमा पनि सल्लाह नभएको उपमेयर खड्गीको भनाई छ । वसन्तपुरमा नयाँ संरचना बनाएको प्रति पुरातत्व विभागले पनि चासो राखेको छ । विभागले काठमाडौं महानगरपालिकालाई पत्र लेखेर सो संरचनाको निर्माण रोक्न आग्रह गरेको छ ।