इच्छाविपरीत लोला हाने र रङ दल्नेलाई अभद्र व्यवहारमा मुद्दा चलाइने

१ चैत, काठमाडौं ।   सरकारले होली पर्वलाई मध्यनजर गर्दै काठमाडौं उपत्यका लगायत देशैभरिको सुरक्षा व्यवस्था कडा बनाउने भएको छ । होलीमा काठमाडौंमा मात्रै १७ सय प्रहरी परिचालन गरी रिजर्भ फोर्सको समेत व्यवस्था गरिएको छ ।

गृह मन्त्रालयका अनुसार होलीलाई सद्भाव र भाइचाराको रुपमा मनाउन आग्रह गर्दै अनिच्छुकमाथि जबरजस्ती र अभद्र ढंगले रङको प्रयोग गर्नेलाई मुद्दा चलाउन समेत निर्देशन दिइएको छ ।

होली पर्वलाई मर्यादित रूपमा मनाउनुपर्ने भन्दै इच्छाविपरीतका कार्य भए प्रहरी कानुनी रूपमा प्रस्तुत हुने र कारवाही चलाउन बाध्य हुनेछ । होलीका नाममा कसैमाथि पनि जबरजस्ती भएको पाइए प्रहरीलाई कानुनानुसार अगाडि बढ्न निर्देश गरिएको छ ।

पर्वलाई अमर्यादित बनाउने, मदिरालगायत अन्य लागुऔषधजन्य पदार्थ सेवन गरेर होली खल्नेलाई अभद्रव्यवहार अन्र्तगत कारवाही गरिने भएको छ ।

कोरोना महामारीका कारण अघिल्ल वर्षहरूमा खुलेर होली पर्व मनाउन नपाएकाले यो वर्ष भिडभाड बढ्न सक्ने प्रहरी बुझाइ छ । काठमाडौंका दर्जनौँ स्थानमा होलीका दिन विभिन्न सांस्कृतिक कार्यक्रम हुने भएकाले त्यसमा प्रति प्रहरीले निगरानी गर्ने भएको छ ।

यो वर्षको होली पर्व काठमाडौंसहित पहाडी र हिमाजी क्षेत्रमा बिहीबार र तराईमा शुक्रबार परेको छ । होलीमा वसन्तपुर, सानोगौचरण, भृकुटीमण्डप, ठमेल, असन, नयाँ बानेश्वर, लैनचौरलगायत दुई दर्जन क्षेत्रमा बाक्लो सुरक्षा उपस्थिति बढाइने प्रहरीले जनाएको छ ।