माओवादी केन्द्रले निर्वाचन अभियानमा केन्द्रीय नेताहरु खटाउने

 १ चैत, काठमाडौं ।  सत्तासाझेदार दल नेकपा (माओवादी केन्द्र) ले स्थानीय तह निर्वाचनकेन्द्रित दुईमहिने अभियान सञ्चालन गर्ने भएको छ । चुनावी कार्यक्रमअन्तर्गत केन्द्रीय सदस्यहरूलाई गाउँपालिका र नगरपालिकामा खटाउने तयारी गरिएको छ ।

सम्पन्न केन्द्रीय कमिटी बैठकको निर्णयानुसार माओवादीले चुनावी कार्यक्रम बनाएको माआवादीले जनाएको छ । गाउँपालिका, नगरपालिका, महानगरपालिकामा निर्वाचन परिचालन कमिटी गठन गरी प्रदेश कमान्डको मातहतमा परिचालन कमिटी निर्माण गरिने भएको छ ।

प्रत्येक प्रदेशमा पाँच कमान्ड बनाइएको छ । प्रदेश कमान्डअन्तर्गत रहेर निर्वाचन परिचालन कमिटी गठन हुनेछ । एकजना केन्द्रीय सदस्यलाई तीनवटासम्म गाउँ÷नगरको नेतृत्व गनुपर्ने बताइएको छ ।

स्थानीय तहको निर्वाचनमा पार्टीका उमेदवारहरू टुंग्याउने जिम्मा प्रदेश कमिटीलाई दिइएको छ । केन्द्रको परामर्शमा प्रदेशले उमेदवार टुंग्याउने छ । हाल प्रदेशको प्रशिक्षण चलिरहेको र त्यसमा निर्वाचनकेन्द्रित कार्यक्रम बनाएर पठाइने छ ।