इन्जिनियर्स एशोसिएसनको मतगणना जारी, कांग्रेस निकट सिडेनले प्यानलै जित्ने सम्भावना

१ चैत, काठमाडौं ।  नेपाल इन्जिनियर्स एशोसिएसनको निर्वाचनमा सत्तारुढ नेपाली कांग्रेस निकट सेन्टर फर डेमोक्रेटिक इन्जिनियर्स (सिडेन) ले अग्रता कायमै राखेको छ । झण्डै हजार मतले कांग्रेस निकट सिडेनका उम्मेदवार अगाडी रहेकाले उनको जित निश्चित जस्तै भएको छ ।

निर्वाचन समितिले दिएको पछिल्ला जानकारी अनुसार जारी मतगणना सिडेन सबै पदाधिकारीमा अगाडी देखिएको छ । कुल ९०७७ मत गणना गरिसक्दा अध्यक्षमा सिडेनका हरिबहादुर दर्लामीले ३६६९ मतसहित अग्रता लिएका छन् । मतदान हुँदा १० हजार १९३ मत खसेको थियो ।

दोस्रो स्थानमा नेकपा (एमाले) निकट इन्जिनियरको संस्थाबाट अध्यक्षमा उठेका सुरज लामिछानेले २७५९ मत ल्याएका छन् । महासचिवमा पनि सिडेनकै अग्रता छ ।

रविभूषण झाले ३७५८ मत ल्याएर अग्रता लिइरहका छन् । दोस्रोमा एमाले निकट इन्जिनिरको संस्थाबाट भेषराज थापाले २४५१ मत ल्याएका छन्, जुन झाको भन्दा १३०७ ले कम हो ।

प्रदेशतर्फ पनि सिडेनले नै जित हासिल गरेको छ । अहिलेसम्म ७ मध्य ५ प्रदेशको नजिता आइसकेकोमा सबैमा सिडेनले जितेको छ । कांग्रेस निकटकै इन्जिनियरहरूले दिलीपकुमार झाको नेतृत्वमा अर्को प्यानल बनाएर प्रतिस्पर्धामा गरेपनि नेपाली कांग्रेसले दर्लामीकै प्यानललाई आधिकारिक मान्यता दिएको छ ।