पोखरा विमानस्थलको लगानीमा गृहमन्त्री खाँडले उठाए प्रश्न

१ चैत, काठमाडौं ।  गृहमन्त्री बालकृष्ण खाँडले पोखरा विमानस्थलमा भइरहेको लागतमाथि प्रश्न उठाएका छन् । उनले छिमेकी राष्ट्र चीन सरकारको ऋण लगानीमा निर्माण भइरहेको पोखरा क्षेत्रीय विमानस्थलको लागत भैरहवा विमानस्थलको भन्दा बढी हुनुको कारण समेत मागेका छन् ।

विश्व उपभोक्ता अधिकार दिवसको अवसरमा आयोजित कार्यक्रममा खाँडले भैरहवा विमानस्थल भन्दा पोखरा विमानस्थलको लागत चर्को भएको र यसको कारण के हो भन्ने विषयमा खोजि हुनुपर्ने बताए ।

विमानस्थलमा लगानी गर्ने देशको नाम उल्लेख नगरी खाँडले भैरहवा विमानस्थल भन्दा सानो भएर पनि पोखरा विमानस्थलको लागत किन महँगो हो भन्ने प्रश्न गरेका हुन् । देशका विकास आयोजनामा हुने लगानीबारे बहस हुनुपर्ने उनको भनाई छ ।

भैरहवा विमानस्थल नेपाल सरकार र एशियाली विकास बैंकको लगानीमा ३ हजार मिटर धावन मार्ग भएकोलाई ७ अर्ब र २५ सय मिटर धावनमार्ग भएको पोखराको लागत २१ अर्ब किन र कसरी भयो भन्दै खाँण खोजिहुनुपर्ने बताए ।