संसद अधिवेशन स्थगित गरिएको विषयमा छलफल गर्न एमालेले बोलायो संसदीय दलको बैठक

२ चैत, काठमाडौं ।  सरकारले अकारण संसद अधिवेशन स्थगित गरेको भन्दै त्यसको विरोध गरिहेको प्रमुख प्रतिपक्ष दल नेकपा (एमाले) यसै विषयमा छलफल गर्न संसदीय दलको बैठक बोलाएको छ ।

बुधबार दिउँसो ३ बजे बस्ने बैठकले संसद स्थगितपछि उत्पन्न हुने परिस्थितिका विषयमा छलफल हुने एमाले संसदीय दलका उपनेता सुवास नेम्वाङले जानकारी दिए ।

बैठक नयाँ बानेश्वरस्थित संघीय संसद् भवनको ल्होत्से हलमा बस्नेछ । संसद् अधिवेशन अन्त्य भएको भोलिपल्ट एमाले अपरझट संसदीय दलको बैठक बोलाएको हो । बैठकमा पार्टीको माग, प्रधानन्यायाधीश चोलेन्द्र शम्शेर जबराबिरुद्धको महाअभियोग र नागरिकता विधेयक सम्बन्धमा छलफल हुने बताइएको छ ।

पार्टीले कारबाही गरेका १४ सांसदको सूचना टाँस गर्नुपर्ने मागसहित एमाले लामो समयदेखि संसद् बैठक अवरुद्ध गर्दै आएको थियो । एमालेको अवरोधकै बीच सभामुख अग्निप्रसाद सापकोटाले बैठकका काम–कारबाही अघि बढाएका थिए ।