आन्दोलनका कारण मेलम्ची खानेपानीको पुनर्निर्माण फेरी प्रभावित

२ चैत, काठमाडौं ।  आफ्ना माग पूरा नभएको भन्द बाढीपीडित स्थानीय आन्दोलनमा उत्रिएपछि मेलम्ची खानेपानी आयोजनाको पुनर्निर्माण कार्य फेरी प्रभावित भएको छ ।

बाढी प्रभावित स्थानीय माग पूरा गराउन आन्दोलनमा उत्रिएपछि पुननिर्माणको काममा बाधा पुगेको मेलम्ची खानेपानी आयोजनाले जनाएको छ ।

गत वर्षको बाढीले मेलम्ची बजार क्षेत्रमा पुर्याएको क्षति, नदी नियन्त्रणका लागि तटबन्ध, बस्ती संरक्षण, मेलम्ची–इन्द्रावती करिडोर एकीकृत विकास परियोजना र नदीलाई पुरानै धारमा ल्याउन तत्काल बजेट छुट्ट्याएर काम गर्नुपर्नेलगायत स्थानीयको माग छ ।

आन्दोलन सुरु भएपछि खानेपानीमन्त्री उमाकान्त चौधरी, आयोजनाका कार्यकारी निर्देशकसहितको टोली स्थानीयका समस्या समाधानका लागि मेलम्ची गएको बताइएको छ । खानेपानीमा विभिन्न जटिलता भए पनि अस्थायी रूपमा आउँदो चैत÷वैशाखमा काठमाडौंमा पानी ल्याउने सरकारको तयारी छ ।

आयोजनाको हेडवक्सको मर्मत र सुरुङमार्ग सफाइको काम सकिन लागेको आयोजनाले जनाएको छ । सहायक सुरुङ र संरचनामा नयाँ उपकरणहरू जडान गर्नुपर्ने देखिएको छ ।