‘पार्टीमा पद पाइएन भनेर रुने, कराउने र भाग्नेको जमात बढ्यो’

२ चैत, काठमाडौं ।  नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले स्थानीय तहको चुनावी प्रचार अभियान अन्तरगतको प्रशिक्षण कार्यक्रममा आफ्ना कार्यकर्ताको व्यवहारप्रति लक्षित गर्दै आक्रोश पोखेका छन् ।

बुुधबार काठमाडौंमा आयोजित प्रशिक्षणमा प्छिल्लो समययमा पार्टीका नेता कार्यकर्तामा विचलन देखिएको भन्दै उनले हिजो युद्धको समयमा शहादत दिनका लागि झगडा गर्नेहरू नै आज पदका लागि मरिहत्ते गर्ने अवस्थामा पुगेको बताए ।

प्रचण्डले पार्टीभित्र वैचारिक अस्पष्टता बढ्दै गएकाले अराजकता, गुटबन्दी र पदलोलुपता बढ्दै गएको भन्दै हिजोको त्यो जमात आज पदका लागि झगडा गर्ने र पद पाइएन भनेर रुने, कराउने र भाग्नेको जमातका रुपमा परिणत भएको बताए ।

क्रान्तिकारी पार्टी निर्माण र रूपान्तरणको प्रक्रिया सुरु भएको भनिएपनि वास्तवमा त्यो हुन नसकेको उनको भनाई थियो । क्रान्ति र रूपान्तरणको कुरा फगत उपदेशजस्तो भएको भन्दै उनले क्रान्ति र रूपान्तरणका निम्ति कुनै उल्लेख्य सुधार नभएर औपचारिकताका लागि थेगो जस्तो भएको बताए ।

संगठनको स्थिति र नेता कार्यकर्ताको वैचारिक स्तर तथा आचरण हेर्दा दिनप्रतिदिन कम्युनिस्ट आन्दोलनबाट विचलनतर्फ गएको महसुस भएको गुनासो गर्दै उनले आफुले क्रान्तिको कुरा गरिरहेपनि पार्टी बिस्तारै बुर्जुवाकरण भइरहेको र अराजकता बढिराखेकाले समस्या पैदा भएको दावी गरे ।