साना दलहरुलाई निर्वाचनमा उनीहरुकै चुनाव चिह्न दिन आयोग तयार

२ चैत, काठमाडौं ।  राष्ट्रिय दलको मान्यता नपाएका साना दलहरुले स्थानीय तहको चुनावमा आफ्नै चुनाव चिह्न पाउने भएका छन् । राष्ट्रिय दलको मान्यता नपाएका दलहरुलाई उनीहरुकै चुनाव चिह्न दिन निर्वाचन आयोग सकारात्मक भएको हो ।

त्यसका लागि दलहरुले कुन कुन जिल्लामा आफ्नो दलको संगठनात्मक संरचना छ भन्ने विवरण मतपत्र छाप्नु अघि नै निर्वाचन आयोगलाई दिनुपर्नेछ । निर्वाचन आयोगले राष्ट्रिय मान्यता नपाएका ७३ वटा राजनीतिक दलको चुनाव चिन्ह दिने विषयमा लामो छलफल गरेको थियो ।

साना दलका प्रतिनिधिसँग औपचारिक तथा अनौपचारिक छलफल पश्चात प्राप्त सुझावको आधारमा चुनाव चिन्हबारे निर्णय भएको हो । बैशाख ३० गते हुने स्थानीय तहको निर्वाचनमा सहभागी हुने दलको संख्या ७९ छ ।

जसमध्ये ६ वटा दलले राष्ट्रिय मान्यता पाएका छन् । राष्ट्रिय मान्यता पाएका दलले मात्र निर्वाचनमा पार्टीको चुनाव चिन्ह प्रयोग गर्न पाउने प्रावधान छ ।

२०७४ सालको स्थानीय तहको निर्वाचनमा राष्ट्रिय मान्यता नपाएका राजनीतिक दलले फरक फरक स्थानका लागि छु्ट्टा छुट्टै चुनाव चिन्ह पाउँदा चुनावी प्रचार झन्झटिलो भएको गुनासो गरेका थिए ।