हामी भन्दा सेटिङमा चुनाव जित्न कांग्रेस र एमाले धेरै सिपालु छन्ः प्रचण्ड

२ चैत, काठमाडौं ।  नेकपा माओवादीका अध्यक्ष पुष्पकमल दाहाल ‘प्रचण्ड’ले माओवादी भन्दा सेटिङ गरेर चुनाव जित्न कांग्रेस एमाले नै सिपालु भएको बताएका छन् । उनले जालझेल गर्न, षड्यन्त्र गर्न, बाकस साट्न या अरु सेटिङ मिलाएर चुनाव जसरी पनि हात पार्न माओवादी सिपालु नभएको बताए ।

बुधबार काठमाडौंमा आयोजित पार्टीको आन्तरिक प्रशिक्षणमा प्रचण्डले विगतमा पार्टीका सम्पूर्ण शक्तिहरु आक्रामक ढंगले प्रस्तुत हुँदा चुनाव जितिएको तर अहिले समयनै जालझेल र सेटिङमा गएको बताउँदै माओवादीहरू त्यसमा सिपालु नभएको बताए ।

उनले हामीले सक्ने भनेको जालझेल गर्नेलाई दनक दिन मात्रै हो, इटको जवाफ पत्थरले दिएर सातो लिन मात्रै माओवादीले जानेको बताए । प्रचण्डले आगामी चुनाव पार्टीका लागि जीवन मरणको सवाल भएको दुखेसो गरे ।

आउने निर्वाचनमा माओवादीलाई परास्त गर्ने र कतिपय साम्राज्यवादी देशमा जस्तै नेपालमा पनि दुई पार्टी सिस्टम लागू गर्ने षड्यन्त्र भइरहेको प्रचण्डले दाबी गरे । त्यसका लागि देशी विदेशी प्रतिक्रियावादी लागिपरेको प्रचण्डको भनाइ छ ।

प्रचण्डले गठबन्धनबाट आश गरेर आउला र खाउँला भन्ने पक्षमा पार्टी नभएको बताउँदै आफ्नै खुट्टामा उभिएर आफ्नै तागतका साथ चुनाव जित्ने गरी लाग्नुपर्नेमा जोड दिए ।