चैतमा गर्ने भनिएको दलित संघको महाधिवेशन स्थगित

३ चैत,काठमाडौं ।  नेपाली कांग्रेसको भ्रातृ संस्था दलित संघको चैत ७ देखि ९ सम्म बुटबलमा हुने गरी तय भएको महाधिवेशन फेरि स्थगित भएको छ ।

आसन्न स्थानीय तहको निर्वाचनका लागि पार्टी चुनावी प्रचार अभियानमा रहेकाले स्थगित गर्न निर्देशन दिइएको बताइएको छ ।

दलित संघको महाधिवेशन अनिश्चितकालको लागि स्थगित भएको छ र अब स्थानीय तहको निर्वाचन पछि हुने भनिएको छ । कांग्रेस नेताहरुले स्थानीय तहको निर्वाचनको कारण देखाउँदै दलित नेताहरुलाई महाधिवेशन स्थगित गर्न आग्रह गर्दै आएका थिए ।

२०७३ सालमा हुनपर्ने संघको महाधिवेशन हालसम्म सर्दै आएको छ । २०७३ सालमै सबै जिल्लाको अधिवेशन भने सकिसकेको थियो ।

सभापति शेरबहादुर देउवा पक्षबाट शम्भु हजारा पासवान, लोकेन्द्र विक, रामकृष्ण लकान्द्री, क्षेत्रसिंह टेलरलगायत संघको अध्यक्षका आकांक्षी थिए ।

संस्थापनइतरबाट डोबाटे विश्वकर्मा, मुक्त महते, शिव सुनार र कृष्ण बिके रसाइलीले अध्यक्षमा दाबी गरेका थिए ।