गठबन्धनका लागि कांग्रेस नमाने एमाले मनाउने प्रचण्डको संकेत

चैत, बुटवल ।  नेकपा (माओवादी केन्द्र) का अध्यक्ष पुष्पकमल दाहाल प्रचण्डले कांग्रेस नमाने नेकपा एमालेसँग गठबन्धनको प्रयास हुने बताएका छन् । उनले माओवादी कोसँग गठबन्धनमा जान्छ भन्ने कुरा कांग्रेसकै हातमा रहेको बताए ।

बिहीबार बुटवलमा सञ्चारकर्मीहरुसँग कुरा गर्दै प्रचण्डले तत्काल एमालेसँग सहकार्यको सम्भावना नरहेको बताउँदै असम्भव पनि नरहेको दावी गरे । आफूहरु पाँचदलीय गठबन्धनमा रहेको भन्दै उनले भने, ‘तत्काल एमालेसँग सहमति हुने सम्भावना कम छ । तर यो एक हदसम्म कांग्रेसको व्यवहारमा पनि भर कुरा भयो ।’

केही नेताहरूले कुनै हालतमा तालमेल गरिँदैन भनेर अतिवाद ढंगले बोल्न थालेको भन्दै उनले भने, ‘कांग्रेसले लखेट्न थाल्यो भने परिस्थिति के हुन्छ भन्न सकिँदैन ।’ तर कांग्रेस सभापति एवं प्रधानमन्त्री शेरबहादुर देउवा हर हालतमा गठबन्धनलाई बचाएर जानुपर्छ भन्नेमा भएकाले त्यो (एमालेसँग तालमेल गर्ने) परिस्थिति आउला भन्ने देखेको छैन ।’