एकीकृत समाजवादीको अस्तित्व सखाप पारिदिने एमाले महासचिव पोखरेलको चेतावनी

३ चैत, काठमाडौं ।  एकिकृत समाजवादीका अध्यक्ष माधवकुमार नेपालले एमालेलाई चुनावमा चेताउने अभिव्यक्ति दिएको केहि क्षणमै नेकपा एमालेका महासचिव शंकर पोखरेलले माधवकुमार नेपाल नेतृत्वको नेकपा एकीकृत समाजवादीको अस्तित्व नै सखाप पारिदिने चेतावनी दिएका छन् ।

अखिल नेपाल महिला संघले बिहीबार काठमाडौंमा आयोजना गरेको प्रशिक्षक प्रशिक्षण कार्यक्रममा उनले एकीकृत समाजवादी भविष्यमा अस्तित्व नै नरहने अवस्था सिर्जना गरिदिने बताए ।

उनले एमालेले माधव नेपालको पार्टीलाई मान्यता नदिनुको अर्थ भनेकै उसलाई हराउनु भएको बताए ।

भविष्यमा त्यो पार्टी अस्तित्वमा नरहोस् भन्नका लागि एमालेले चुनाव नजित्ने खालको स्थिति सिर्जना गर्ने भन्दै चुनावमा हारेपछि सो पार्टी एमालेमै समाहित हुने दावी गरे ।

जसरी विगतमा नेकपा माले भन्ने पार्टीलाई सबैतिर चुनाव हराइदिएपछि झोली झुम्टा बोकेर सबै कमरेडहरु एमाले फर्किए यसको पनि त्यस्तै हविगत हुने पोखरेलले बताए ।

महासचिव पोखरेलले अरु साना कम्युनिस्ट पार्टीलाई पनि चुनावमा हराएर एमालेमा समाहित गर्ने बताए ।

नेता जोडेर बलियो कम्युनिस्ट पार्टी बनाउन खोज्दा सफल नभएकाले अब कार्यकर्ता जोडेर कम्युनिस्ट पार्टी बलियो बनाउने र त्यसका लगि साना पार्टीहरुलाई चुनावमा हराएर कार्यकर्तालाई आफूसित ल्याउने उनको भनाई छ ।