कांग्रेसका कारण गठबन्धन भत्कदैन, कायम राख्न प्रतिवद्ध छौँः गृहमन्त्री खाँण

३ चैत, बुटवल ।  नेपाली कांग्रेसका नेता एवं गृहमन्त्री बालकृष्ण खाँणले कांग्रेस गठबन्धन भत्काउने पक्षमा नरहेको बताएका छन् । उनले असहज परिस्थिितिमा बनेको सत्ता गठबन्धनलाई कायम राख्न कांग्रेस प्रतिवद्ध रहेको बताए ।

नेपाली कांग्रेसले रुपन्देहीको फार्साटिकरमा गरेको कार्यक्रममा नेता खाँणले व्यवस्था संकटमा जान लागेको जटिल समयमा बनेको सत्ता गठबन्धनलाई कायमै राखेर कांग्रेस चुनावमा जान चाहेको बताए ।

कांग्रेसका कतिपय नेताहरुबाट पार्टी एक्लै चुनाव लड्नुपर्ने धारणा बाहिर आइरहँदा गृहमन्त्री खाँणले गठबन्धनलाई साथमै राखेर कांग्रेस चुनावमा जान प्रतिवद्ध रहेको बताएका हुन् ।

बिहीबार विहान बालुवाटारमा भएको सत्ता गठबन्धनका शीर्ष नेताबीचको छलफलमा पनि गठबन्धन कायम रहने जानकारी दिएको उनले बताए ।

खाँडले हालै संसदबाट पारित भएको एमसीसी परियोजनाको सफल कार्यान्वयन पछि पेट्रोलियम पदार्थको आयात प्रतिस्थापनमा मद्दत पुग्ने विश्वास समेत व्यक्त गरे । विद्युत ट्रान्समिसन लाइन निर्माण र सडक स्तरोन्नतिको लागि एमसीसी स्वीकार गरिएको उनको भनाई छ ।

पेट्रोलियम पदार्थको मुल्यसँगै आयात पनि वृद्धि भइरहेको अवस्थामा विद्युतीय उपकरणको प्रयोग गरेर पेट्रोलियम पदार्थको आयात प्रतिस्थापन गर्न एमसीसीको महत्वपूर्ण भूमिका हुने भन्दै खाँडले एमसीसी परियोजनाको माध्यमबाट आउने अनुदानले नेपालको गरिबी घटाउन समेत मद्दत पुग्ने बताए ।