घोषणापत्र बनाउनेदेखि वास्तविक अवस्थाबारे रिपोर्ट पठाउन कांग्रेस महामन्त्रीद्वयको निर्देशन

४ चैत, काठमाडौं ।  नेपाली कांग्रेसले स्थानीय तहको निर्वाचनलाई केन्द्रमा राखेर अहिलेसम्म कांग्रेस पार्टीको अवस्था र गरिनुपर्ने थप कार्यकाबारे चैत १५ भित्र केन्द्रलाई जानकारी गराउन देशभर सर्कुलर जारी गरेको छ ।

महामन्त्रीद्वय गगन थापा र विश्वप्रकाश शर्माले जारी गरेको सात पृष्ठको सर्कुलरमा स्थानीय तहको निर्वाचनलाई केन्द्रमा राखेर गतिविधि गर्न तल्लो तहका सबै संरचनालाई निर्देशन दिइएको हाे । साे निर्देशनमा पेशा, व्यवसाय, अध्ययनका लागि प्रदेश वा केन्द्रीय राजधानीमा गएका नागरिकहरुको तथ्यांक राख्न तथा सम्पर्क गर्न पनि आग्रह गरिएको छ ।

पुराना मतदाताको अवस्थासहित नयाँ थपिएका मतदातसहितको अभिलेख राख्न र स्थानीय तहलाई आफैं घोषणापत्र बनाउन भनिएको छ । अघिल्लो चुनावमा कांग्रेसले जितेको स्थानमा पाँच वर्षको अवधिमा गरेका सुधार, उपलब्धि तथा सकारात्मक कार्य घोषणापत्रमा समावेश गर्न सुझाइएको छ ।

अन्य दलले प्रतिनिधित्व गरेका स्थानमा भएको भ्रष्टाचार र अनियमितता देखाउँदै तल्लो संरचनाले गरेका गतिविधिको हरेक १५ दिनमा गतिविधिको उपल्लो तह सहित केन्द्रलाई जानकारी गराउन सर्कुलर गरिएको हो ।

सर्कुलरमा अरु दल विभाजन पश्चात् पार्टीको शक्ति सन्तुलनको जानकारी पठाउन र कांग्रेस छोडेर अन्य पार्टीमा गएका स्थानीय कार्यकर्ता र त्यसले पारेको पार्टीमा प्रभाव आकलन गरी केन्द्रमा पठाउन भनिएको छ ।

वैशाख ३० मा निर्धारित स्थानीय तहको निर्वाचन माहोल र पार्टीले तय गर्नुपर्ने बाटोका बारेमा केन्द्रलाई चैत १५ भित्र जानकारी गराउन भनिएको छ ।