स्थानीय निर्वाचनबारे ‘विप्लव नेतृत्वको नेकपामा विवाद, कपिलबस्तुमा निर्णायक बैठक जारी

४ चैत, काठमाडौं ।  स्थानीय तह निर्वाचनमा पार्टीभित्र पक्ष र विपक्षमा धारणा आएपछि नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) ले यसबारे धारणा बनाउन केन्द्रीय समिति बैठकमा छलफल सुरु गरेको छ । चुनावको समर्थनमा जाने कि बहिस्कार गर्ने निर्णयका लागि बैठक डाकिएको हो ।

कपिलवस्तुको शिवगढीमा शुक्रबार बिहानदेखि सुरु भएको बैठकले चुनावका विषयमा आएका फरक धारणमा छलफल भइरहेको छ । चुनावमा जानुपर्नेमा महासतिव विप्लव र प्रवक्ता विश्वकर्मा एकमत रहे पनि कोसँग मिलेर जाने भन्नेमा उनीहरुबीचमै मतभिन्नता छ ।

केन्द्रीय समितिको बैठकले बैशाख ३० गते हुने स्थानीय तह निर्वाचनलाई उपयोग वा बहिस्कार गर्ने भन्नेबारे नीतिगत निर्णय गर्ने छ । गत २६ फागुनमा सम्पन्न भएको सचिवालय बैठकमै महासचिव विप्लवले चुनाव उपयोगबारे प्रस्ताव गरेका थिए ।

उक्त प्रस्तावबारे नेकपाको उच्च तहमै समान मत छैन । पाँच सदस्यीय सचिवालय बैठकमा विप्लवको प्रस्तावको पक्षमा प्रवक्ता विश्वकर्मा मात्रै उभिएका छन् । पार्टीमा विप्लव र प्रवक्ता विश्वकर्माको पडक भएकाले केन्द्रीय समिति बैठकले चुनाव उपयोगको नीति लिने अनुमान गरिएको छ ।