चुनावी तालमेलका लागि सत्ता गठबन्धनबीच भद्र सहमति हुँदै

४  चैत, काठमाडौं ।  आगामी स्थानीय तहको निर्वाचनमा सत्ता गठबन्धनका नेताहरुबीच तालमेल गर्ने कि नगर्ने भन्ने बहस भइरहेका बेला गठबन्धनका शीर्ष नेताहरुले भने भद्र सहमतिमा जाने तयारी गरेका छन् । उनीहरुबीच भएका छलफलमा गठबन्धन गर्ने भन्ने मोटामोटी सहमति भएपनि कुन मोडलमा जाने भन्ने विषयमा सहमति जुटेको छैन् ।

प्रधानमन्त्री शेरबहादुर देउवानिकट रहेका एक नेताले दिएको जानकारी अनुसार शीर्ष नेताहरुबीच भद्र सहमतिको खाका तयार हुने र त्यसलाई पार्टीका केन्द्रीय समितिका बैठकमा छलफल गराउने तयारी भएको छ ।

खाका तयार भएपछि सत्तामा रहेका चारलदका शीर्ष नेताहरुले आ—आफनो पार्टीको केन्द्रीय समितिको बैठकमा यसबारे जानकारी गराएर निर्णय गराउने छन् ।

भद्र सहमतिका लागि खटाइएका नेताहरुले अहिले सरकारमा रहेका कुन दलले कुन स्थानीय तह र कति सिट जितेका छन् र त्यसमा अरु पार्टीको अवस्था कस्तो थियो भन्ने कुराको तथ्याँक संकलन गरिरहेको बताइएको छ ।

अब हुने स्थानीय तहको निर्वाचनमा यस अघिको निर्वाचनमा विजयी भएको पार्टी र उ भन्दा पछाडी रहेका पार्टीले पाएको मतका आधारमा गठबन्धनको उम्मेदवार तय हुनेछ । यसका लागि २०७४ को स्थानीय तहको निर्वाचनलाई आधार बनाइने भएको छ ।

गठबन्धनभित्र पार्टीगत रुपमै सहमति भएर आए स्थानीय, प्रदेश र प्रतिनिधि सभामा समेत तालमेलको भद्र सहमति बनाइने भएको छ । अहिलेलाई आ—आफ्नो शक्ति बढाउन सक्रिय हुने र चुनावमा एकैपटक भद्र सहमतिबाट बनेको खाकालाई व्यवहारमा उतार्ने गरी रणनीति दलहरुले बनिरहेको बताइएको छ ।

भद्र सहमति अनुसार स्थानीय निकायको निर्वाचनमा यसअघि जुन दलले जित हासिल गरेको हो त्यहाँ त्यही दललाई प्राथमिकतामा राखेर साझा उम्मेदवार बनाइने छ । महानगरपालिकाहरुमा कांग्रेसले यसअघि मेयर जितेको स्थानमा काँग्रेसको उम्मेदवारलाई गठबन्धनका अन्य दलले सघाउने छन् ।

गठबन्धनका दलबाहेकले जितेको पालिकाहरुमा भने गठबन्धनको दलको उक्त पालिकामा शक्तिको अवस्था हेरेर नेताहरुले मापदण्ड बनाउने भएका छन् । प्रतिनिधि सभा र प्रदेश क्षेत्रमा हाल जुन दलको सांसद छन् सोही दलको सिट सुरक्षित हुने गरी मापदण्ड बनाउने भन्नेमा पनि छलफल चलिरहेको छ ।

प्रत्यक्षतर्फ १६५ सिटमध्ये २०७४ मा माओवादीले ३६ सिटमा जित हासिल गरेको थियो । ४ सांसद नेकपा एमालेमा प्रवेश गरेपछि उनीहरुको पद नै खारेज भएपछि माओवादीका ३२ सांसद रहेका छन् । माओावदीले यसअघि चुनाव जितेको क्षेत्रमा गठबन्धनबाट साथ पाउने आसा गरेको छ ।

काँग्रेसले २०७४ को चुनावमा २३ सिटमा प्रत्यक्ष निर्वाचन जितेको थियो । यसरी हेर्दा, प्रत्यक्षतर्फ काँग्रेसको २३, माओवादीको ३२, नेकपा एस १३, जसपा ११ र जनमोर्चाको १ गरी ८० सिटको हिसाव लगाइएको छ ।

बाँकी एमाले, लोसपा, राप्रपा, नेमकिपा र स्वतन्त्रले जितेका ८५ सिटहरुमा काँग्रेसले सबैभन्दा बढी पाउनुपर्ने अपेक्षा राखेको छ । यसमा आन्तरिक छलफल भएको तर, सहमति बन्ने वा नबन्ने विषय बाँकिनै रहेको ति नेताले बताए ।