मन्त्री बनाउन सांसद नपाएपछि एकिकृत समाजवादीलाई गण्डकीमा समस्या

४ चैत, पोखरा ।  आफ्नो एक जना पनि सांसद नभएपछि नेकपा एकिकृत समवाजवादीलाई गण्डकी प्रदेशसभामा मन्त्री बनाउन समस्यया भएको छ । निर्वाचित र समानुपातिक दुवै तर्फ एक सांसद पनि नभएपछि समाजवादी गैरसांसदलाई मन्त्री बनाउने तयारी गरेको छ ।

नेकपा एमाले नेतृत्वको सरकार बिस्थापित गर्दै सत्तारुढ ५ दलीय गठबन्धनबाट केन्द्रदेखि प्रदेशसम्म नयाँ सरकार बन्दा ६ वटा प्रदेशमा नेकपा एकीकृत समाजवादीको प्रतिनिधित्व छ । तर, गण्डकी प्रदेश सरकारमा एकीकृत समाजवादीको एक जना पनि सांसद छैनन् ।

६० सदस्यीय गण्डकी प्रदेश सभामा एक जना सांसदले पनि समाजवादी नरोजेपछि नेकपा एकीकृत समाजवादीले एक जना गैरसांसदलाई नै भए पनि प्रदेश सरकारमा पठाउने तयारी गरेको छ । नेपाली कांग्रेसका एक जना मन्त्रीले राजीनामा दिने र समाजवादीबाट एक जनालाई गण्डकी प्रदेश सरकारमा मन्त्री बनाउने तयारी छ ।

कांग्रेस सांसदीय दलका नेता कृष्णचन्द्र नेपाली पोखरेलको नेतृत्वमा बनेको गण्डकी सरकारमा एक गैरसांसदलाई मन्त्री बनाउने तयारी भएको एकीकृत समाजवादीका केन्द्रीय उपाध्यक्ष तथा गण्डकी प्रदेश इन्चार्ज केशवलाल श्रेष्ठले बताएका छन् ।