राष्ट्रिय सभाका अध्यक्ष तिमिल्सिना आज इन्डोनेसिया जाँदै

४ चैत, काठमाडौं ।  राष्ट्रिय सभाका अध्यक्ष गणेशप्रसाद तिमिल्सिना शुक्रबार बेलुका इन्डोनेसिया जाने भएका छन् । अन्तरव्यवस्थापिका संघको १४ औँ सम्मेलनमा भाग लिन उनीसहितको टोली इन्डोनेसिया जाने भएको हो ।

आजदेखि १० गतेसम्म हुन लागेको अन्तरव्यवस्थापिका संघको सम्मेलनमा भाग लिन तिमिल्सिनाको नेतृत्वमा नौ सदस्यीय प्रतिनिधिमण्डल आज बेलुका ९ः३० बजे त्रिभुवन अन्तर्राष्ट्रिय विमानस्थलबाट प्रस्थान गर्ने संघीय संसद् सचिवालयले जनाएको छ ।

प्रतिनिधिमण्डलमा राष्ट्रिय सभा सदस्यहरू भैरव सुन्दर श्रेष्ठ, अनिता देवकोटा तथा प्रतिनिधिसभा सदस्यहरू सुरेन्द्रकुमार कार्की, उमाशंकर अरगरिया हुनेछन् ।

संघीय संसद्का महासचिव डा. भरतराज गौतम, राष्ट्रिय सभाका सचिव राजेन्द्र फुँयाल, राष्ट्रिय सभा अध्यक्षका प्रमुख स्वकीय सचिव गोविन्द अकेला र उपसचिव रेखा उपाध्याय पनि प्रतिनिधिमण्डलमा रहने सचिवालयले जानकारी दिएको छ ।

सम्मेलनमा अध्यक्ष तिमिल्सिनाले ‘गेटिङ टु जिरो ः मोबिलाइजिङ पार्लियामेन्ट्स टु एक्ट अन क्लाइमेट चेन्ज’ शीर्षकमा आफ्नो धारणा राख्नेछन् । सम्मेलनको विशेष सत्रमा उनले कोभिड– १९ महामारीको वेलामा नेपालको संसदले गरेका गतिविधिहरूको सम्बन्धमा पनि संक्षिप्त जानकारी प्रस्तुत गर्नेछन् ।

अध्यक्ष तिमिल्सिनाले गभर्निङ काउन्सिलको २०९औँ सत्रमा पनि भाग लिने कार्यक्रम छ । सम्मेलनमा सहभागी भएर प्रतिनिधिमण्डल चैत ११ गते शुक्रबार बेलुकी ८ः४५ बजे नेपाल फर्किने संघीय संसद् सचिवालयले जनाएको छ ।