अब कम्युनिष्टहरु एमालेतिर र प्रजातन्त्रवादीहरु कांग्रेसतिर हुन्छनः भानुभक्त ढकाल

५ चैत, चितवन ।  नेपाल कम्युनिस्ट पार्टी (एमाले) का स्थायी कमिटी सदस्य भानुभक्त ढकालले निर्वाचनपछि नेपालको राष्ट्रिय राजनीति दुई ध्रुर्वमा मात्रै देखिने बताएका छन् ।

अब हुने तीनै तहको निर्वाचन सकिएपछि नेपालमा कम्युनिष्टधारको नेतृत्व एमालेले र प्रजातान्त्रिक धारको नेतृत्व नेपाली कांग्रेसले गर्ने ढकालले दावी गरे ।

प्रेस चौतारी नेपाल जिल्ला शाखा चितवनले भरतपुरमा गरेको पत्रकार सम्मेलनमा नेता ढकालले निर्वाचनपछि अहिलेको गठबन्धनका रंगीविरङ्गी र छिर्केमिर्के दलहरु अस्तित्वमा नरहने बताए । अब एक दलले कम्युनिष्ट र अर्को दलले प्रजातान्त्रिक विचार बोकेर राजनीतिमा प्रतिस्पर्धा गर्ने दिन आएको बताए ।

आउने स्थानीय तहको निर्वाचनमा एकीकृत समाजवादी र माओवादी केन्द्रसँग सहकार्यको प्रसंगमा ढकालले माधव नेपालको समाजवादीलाई एमालेले दलको मान्यता नदिएकले सहकार्य हुन नसक्ने बताए । माओवादीको हकमा भने रुँदै र कराउँदै आए गोत्र एउटै भएकोले सहयोगसम्म गर्न सक्ने ढकालको भनाइ छ । आगामी स्थानीय तह, प्रदेश र केन्द्रको निर्वाचनपछि नेपालका राष्ट्रिय राजनीति दुई ध्रुवमा प्रस्ट रुपमा देखिने नेता ढकालले भने ।

‘चुनावपछि गठबन्धनका रंगीविरङ्गी छिर्केमिर्के दल रहँदैनन्, अस्थित्वको खोजीको लागि उनीहरुको संर्घष जारी रहन्छ’ नेता ढकालले भने, ‘एमाले र कांग्रेसका बीचमा मूल रुपमा प्रतिस्पर्धा हुन्छ, कम्युनिष्टहरु एमालेसँग र प्रजातन्त्रवादीहरु कांग्रेसतिर लाग्छन्, अरुको अर्थ छैन ।’

उनले राज्यशक्तिको दुरुपयोग गरेर अदालतबाट जस्तो खालको क्षेप्यास्त्र आउँछ त्यसलाई काउन्टर दिन एमाले तयारी अवस्थामा रहेको बताए । संवैधानिक नियुक्ति खारेजीको आदेश सर्वोच्चले गरे एमालेले त्यसको काउन्टर दिने चेतावनी दिए ।

नेता ढकालले एमालेले त्यसका लागि आवश्यक तयारी गरेको बताए । ‘एमालेले तयारी अवस्थामा छ, तर हतारिएर उत्ताउलो भएर पहिल्यै हान्दैन’ ढकालले भने, ‘अदातलले प्रचलित विधि, कानुन र पद्धतीको बर्खिलाप हुने गरी आदेश गरे एमालेले आफ्नो सामर्थ्यले भ्याउने गरी विभिन्न मोर्चाबाट त्यसको प्रतिरोध गर्छ ।’