चुनावमा जिरो मत दिएर ओलीलाई जनताले सजाय दिन्छन्ः झलनाथ खनाल

५ चैत, काठमाडौं ।  नेकपा एकीकृत समाजवादीका सम्मानित झलनाथ खनालले आगामी निर्वाचनमा नेकपा एमालेलाई जनताले सजाय दिने बताएका छन् । उनले जनताको संविधानलाई गलत ढंगले प्रयोग गरेर जनअधिकार खोस्न चाहेकाले उसले सजाय पाउनुपने उनको भनाई छ ।

एकीकृत समाजवादीको गुल्मी सम्पर्क मञ्चको भेलालाई सम्बोधन गर्दै खनालले एमाले अध्यक्ष केपी शर्मा ओलीले कम्युनिस्ट पार्टीको बहुमत भएको संसद विघटन गरेकोले आगामी निर्वाचनमा एमालेलाई त्यसको सजाय दिनुपर्ने बताए । एमालेले सजाए पाएन भने देश फेरी अप्ठ्यारो अवस्थामा जाने खनालले बताए ।

उनले भने,‘आगामी निर्वाचनमा केपी ओलीले सबैभन्दा ठूलो सजाय पाउनुपर्छ । उनको बाकसमा जिरो मत पाउनुपर्छ’ । ‘तब मात्र नेपाली जनताले सही ढंगले संविधानको रक्षा गरेको ठहर हुन्छ ।’

कम्युनिस्टको बहुमत रहेको संसदबाट जनमुखी ऐन, कानुन, बजेट र कार्यक्रमहरु ल्याउन सकिने भन्दै खनालले त्यस्तो संसद विघटन गर्नु दक्षिणपन्थी अवसरवाद भएको बताए ।