शेयरबजार २६१६ अंकमा झर्यो, कारोबार रकममा पनि गिरावट

६ चैत, काठमाडौं । आइतबार शेयरबजारको परिसूचक नेप्से २६१६ अंकमा झरेको छ । १४ दशमलव ६७ अंक घटेर परिसूचक २६ सय अंकमा १६ विन्दुमा कायम भएको हो ।

कुल २ अर्ब २७ करोड रुपैयाँको कारोबार भएको छ । यस दिन कुल ४६ कम्पनीको मूल्य बढ्यो भने १४१ को घट्यो । ६ को मूल्य भने स्थिर रह्यो ।

हालै आईपीओ बिक्री गरेको राष्ट्र उत्थान लघुवित्त र इमर्जिङ नेपालको शेयरमूल्य करिब १० प्रतिशतले बढ्यो । निफ्राको शेयरमूल्य करिब ५ प्रतिशत र सप्तकोशी डेभलपमेन्ट बैंकको शेयरमूल्य साढे ४ प्रतिशत बढ्यो ।

यस दिन नेपाल लाइफ इन्स्योरेन्सको सर्वाधिक शेयर खरिदबिक्री भएको छ । यस दिन कम्पनीको सर्वाधिक १६ करोड २९ लाख बराबरको खरिद बिक्री भएको छ । त्यस्तै, जीवन विकास लघुवित्तको १३ करोड ४२ लाख र नेपाल टेलिकमको ८ करोड ८२ लाख रुपैयाँको कारेबार भएको छ ।

यस दिन सबैभन्दा बढी मैलुङ खोला जलविद्युतको ३ दशमलव ७६ प्रतिशतले शेयरमूल्य घटेको छ । त्यस्तै, शिव श्री हाइड्रोपावरको ३ दशमलव ३१ प्रतिशत र प्रभू लाइफ इन्स्योरेन्सको ३ दशमलव २९ प्रतिशतले शेयरमूल्यमा गिरावट आएको छ ।