भोलिदेखि ग्रीन भेन्चर्सले ३१ करोडको आईपीओ निष्काशन गर्दै, कति कित्ता भर्ने ?

७ चैत, काठमाडौं । ग्रीन भेन्चर्स लिमिटेडले भोृलि अर्थात चैत ८ गतेदेखि आईपीओ निष्काशन तथा बिक्री खुला गर्ने भएको छ।

कम्पनीले प्रतिशेयर १०० अंकित मूल्यका ३१ लाख २५ हजार कित्ता साधारण शेयर निष्काशन गर्न लागेको हो। निष्काशन गरिने कुल शेयरमध्ये ३ प्रतिशत अर्थात ९३ हजार ७५० कित्ता शेयर कर्मचारीहरुका लागि सुरक्षित गरिएको छ भने ५ प्रतिशत अर्थात १ लाख ५६ हजार २५० कित्ता सामूहिक लगानी कोषहरुका लागि बाँडफाँट गरिनेछ। सर्वसाधारणले बाँकी २८ लाख ७५ हजार कित्ता शेयरका लागि आवेदन दिन सक्नेछन्।

निष्काशन बन्द छिटोमा चैत ११ गते हुनेछ भने ढिलोमा चैत २२ गते हुनेछ। आईपीओमा नेपाल धितोपत्र बोर्डबाट स्वीकृतिप्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ।

कम्पनीको शेयर निष्काशन तथा बिक्री प्रबन्धक लक्ष्मी क्यापिटल मार्केट लिमिटेड रहेको छ। लगानीकर्ताले न्यूनतम १० कित्ता शेयर खरिदका लागि आवेदन दिनुपर्नेछ भने अधिकतममा ५० हजार कित्ताका लागि आवेदन दिन सक्नेछन्।

आईपीओ निष्काशनका लागि गराएको रेटिङ्गमा कम्पनीलाई केयर रेटिङ्ग नेपालले केयर एनपी डबल बी आईएस रेटिङ्ग प्रदान गरेको छ। यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ।

कति कित्ताको लागि दिने आवेदन ?

ग्रीन भेन्चर्सले कम्पनीले सर्वसाधारण लगानीकर्ताको लागि २८ लाख ७५ हजार कित्ता आईपीओ छुट्याएको छ । उक्त कित्ता नेपाल धितोपत्र बोर्डको निर्देशिका अनसुार बाँडफाँड गर्दा २ लाख ८७ हजार ५ सय जना लगानीकर्ताले १० कित्ताको दरले आईपीओ पाउनेछन् ।

यद्दपी कम्पनीको आईपीओमा भने न्यूनतम कित्ताको लागि आवेदन दिदा पुग्ने देखिन्छ । हालै मात्र आईपीओ निष्कासन गरेका नेष्डो लघवित्तको तीन जना आवेदनले ११ कित्ता आईपीओ हात पारेका थिए । कुनै कम्पनीले सर्वसाधारणको लागि छुट्याएको आईपीओ कित्ता १० कित्ताको दरले बाँडफाँड गर्दा दुई चार कित्ता बच्ने गर्दछ ।

त्यस्तो अवस्थामा २० कित्ता भर्नु पर्ने हुन्छ । तर, ग्रीन भेन्चर्स कम्पनीको आईपीओ १० कित्ताको दरले आईपीओ बाँडफाँड गर्दा बाँकी कित्ता नरहने भएकाले कम्पनीको आईपीओमा १० कित्ता भर्दा पुग्ने देखिन्छ ।