एनआरएनएको सहमति उल्टियो, घले पक्षको सम्मेलन काठमाडौंमा सुरु

८ चैत, काठमाडौं । सोमबार राती  भएको भनिएको गैर आवासीय नेपाली संघ (एनआरएनए)को सहमति उल्टिएको छ । शेष घले पक्षले सहमतिबारे आफुहरुलाई जानकारी नभएको भन्दै एनआरएनएको १० औं विश्व सम्मेलन काठमाडौंमा सुरु गरेको छ । होटल याक एण्ड एतीमा सम्मेलन आयोजना गरिएको छ ।

कार्यक्रममा गैर आवासीय नेपाली संघ (एनआरएनए) का पूर्वअध्यक्ष शेष घलेले सबै गैर आवासीय नेपालीहरुबीच एकता आवश्यक रहेको बताएका छन् । सबै नेपाली बीच पार्टनरसीपको आवश्यकता रहेको भए पनि त्यो हुन नसकेको उनले बताए ।

मंगलबार एनआरएनएको १० औं विश्व सम्मेलनको उदघाटन समारोहमा बोल्दै घलेले अहिले संस्थामा भूकम्प गएको बताए । भूकम्पले आफूले धेरै कुरा सिकेको उनले बताए ।

अर्थमन्त्रीसहित प्रतिनिधिहरुले आफूलाई विश्वास गरेर उपस्थित भइदिएको र यसले आफूहरुलाई उत्साहित बनाएको उनले बताए । बोल्ड डिसिजन गरेर उपस्थित भएको भन्दै उनले अर्थमन्त्री शर्माको प्रशंसा गरे ।

धेरै देशहरुमा भ्रमण बन्देज हुँदा पनि प्रतिनिधिहरु आएको भन्दै उनले खुसी व्यक्त गरे । २५÷३० देशहरुबाट एनआरएन प्रतिनिधिहरु उपस्थिति भएको जानकारी उनले दिए ।