कालो सूचीमा राखेर मधेश प्रदेशका मुख्यमन्त्री राउतको घरमा काटियो पानीको लाइन

८ चैत, जनकपुरधाम ।  लामो समयदेखि महशुल नबुझाएपछि मधेश प्रदेशका मुख्यमन्त्री लालबाबु राउतको घरको खानेपानीको लाइन कटिएको छ । मुख्यमन्त्री भएपछि पानीको महशुल बुझाउन राउत परिवारले आनाकानी गर्दै आएको थियो ।

नेपाल खानेपानी संस्थान वीरगन्ज शाखाका कर्मचारीले दिएको जानकारीअनुसार पटक–पटक ताकेता गर्दा पनि महसुल नबुझाएको कारण मधेश प्रदेशका मुख्यमन्त्री लालबाबु राउतको घरको खानेपानीको लाइन काटिएको हो ।

वीरगञ्जस्थित तेजारथ टोलमा रहेको मुख्यमन्त्री राउतको निजी निवासमा उनको बुवा दशरथ राउतको नाममा खानेपानीको लाइन रहेको थियो । नेपाल खानेपानी संस्थान वीरगञ्जले संस्थानलाई तिर्नुपर्ने बक्यौता रकम नतिरेपछि कालो सुचीमा राखी लाइन काटिएको भन्ने सूचना जारी गरि लाइन काटिएको जनाएको छ ।

मुख्यमन्त्रीको बुवा दशरथको नाममा खानेपानीको जरिवाना सहित १ लाख ६३ हजार २ सय १६ रुपैयाँ बक्यौता रहेको छ । मुख्यमन्त्री राउत सरकारी निवासमा बस्न थालेपछि उनको निजी निवासको रेखदेख उनका बुवा दशरथले नै गर्दै आएका छन ।

वीरगञ्जका अधिकांश नेता र ठूला व्यवसायीहरुले खानेपानी संस्थानको महसुल नतिरी पानी उपभोग गरिरहेको खानेपानी संस्थानको तथ्यांकबाट देखिन्छ । खानेपानीको महसुल बक्यौता रहेकाहरुको सूचना प्रकाशन गर्दै लाइन काटिने संस्थान वीरगन्जका शाखाले जनाएको छ ।