गठबन्धनमा महानगर र उपमहानगरकै चिन्ता

८  चैत, काठमाडौं ।  स्थानीय तह चुनाव नजिकिएपछि सत्तारूढ गठबन्धनभित्र तालमेल गरेर जानेबारे छलफल भएको छ । आज बालुवाटारमा बसेको सत्तागठबन्धनको बैठकमा पनि स्थानीय चुनावमा सहकार्य गरेर जाने विषय छलफल गरेका हुन् ।

काठमाडौं उपत्यका लगायतका महानगर र उपमहानगका विषयमा छलफल भएको बताइएको छ । मुख्यगरी ६ वटा महानगरपालिका र ११ वटा उपमहानगरपालिकामा चुनावी तालमेल गरेर जानुपर्नेमा दलहरू केन्द्रित देखिएका छन् ।

प्रधानमन्त्रीसमेत रहेका नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकीकृत समाजवादी) का अध्यक्ष माधवकुमार नेपालबीच चुनावी सहकार्यबारे छलफल भएको हो ।

प्रधानमन्त्री देउवाको सचिवालयकाअनुसार कांग्रेसले चैत ११ मा केन्द्रीय समिति बैठक बोलाएको छ । उक्त बैठकमा स्थानीय चुनावमा गठबन्धन गर्ने वा नगर्ने भन्नेबारे निर्णय गर्ने पक्षमा सभापति देउवा छन् ।

पार्टीभित्र शेखर कोइराला पक्ष चुनावी गठबन्धनमा देखिएको छैन । तर कोइरालाले कम्युनिष्टहरू मिल्ने हुन् कि भन्ने चिन्ता कांग्रेसमा रहेको बताउने गरेका छन् । माओवादी र एकीकृत समाजवादीले चुनावी गठबन्धनबारे छिटो निर्णय लिनुपर्ने बताइरहेका छन् ।