१८ मिनेट बसेर बागमती प्रदेशसभा बैठक स्थगित

८ चैत, हटौंडा ।  बागमती प्रदेशसभाको बैठक अर्को सूचना नभएसम्मका लागि स्थगित भएको छ । प्रदेशसभाका सभामुख सानुकुमार श्रेष्ठले मंगलबार बसेको प्रदेशसभाको बैठकमा अर्को सूचना नभएसम्मका लागि बैठक स्थगित भएको जानकारी दिएका थिए ।

मंगलबार बसेको बैठक १८ मिनेट बसेर स्थगित भएको थियो । आजको बैठकमा शून्य समय माग गर्दै सांसद्हरुले जनचासोका बारेमा आफ्ना धारणा राखेका थिए ।

बैठकमा सत्तापक्ष नेकपा माओवादी केन्द्रका जगत सिम्खडा, रामकाजी महर्जन, नेपाली कांग्रेसका नरोत्तम वैद्य, राजेन्द्र गुरुङ, प्रतिपक्ष दल विवेकशील साझा पार्टीका रमेश पौड्याल र शोभा शाक्यले आफ्नो धारणा राखेका थिए ।

बैठकमा माओवादी केन्द्रका सांसद सिम्खडाले धादिङ र नुवाकोट जोड्ने पुल अलपत्र पारिएको बारेमा सरकारका ध्यानाकर्षण गराएका थिए । उनले सडक पुलका योजनाहरूमा सरकारले बजेट मात्र खन्याएर नहुने त्यसलाई समयमा नै सम्पन्न गराउनतर्फ अघि बढ्नुपर्ने बताए ।

त्यस्तै काँग्रेसका वैद्यले २१ औँ शताब्दीमा पनि कागजको मत पत्र प्रयोग गरिएको प्रति असन्तुष्टि व्यक्त गर्दै इलेक्ट्रिक मेसिनबाट भोट गर्ने व्यवस्था गर्न माग गरे । उनले कागजको मत पत्रमा सरकारले अर्बौँ रुपैयाँ खर्च गरेकोले त्यसलाई रोकेर प्रविधिसँगै अघि बढ्न माग गरे ।

उनले इलेक्ट्रिक मेसिनको प्रयोग गरेर मतदान गर्ने व्यवस्था गरी सरकारले राज्यको भर कम गर्नुपर्ने बताए । इलेक्ट्रिक मेसिनको प्रयोगले मतदान विश्वसनीय हुनुको साथै मतगणनामा पनि छिटो र सरल हुने उनको भनाई छ ।

त्यस्तै प्रतिपक्ष दल विवेकशील साझा पार्टीका रमेश पौड्यालले पछिल्लो समय चुनाव महँगो बन्दै गएको बताए । उनले सामान्य मानिसले चुनाव लड्न नसक्ने अवस्था आएको भन्दै सरकारले यसको नियन्त्रणमा लाग्नु पर्ने बताए । चुनाव लड्ने उम्मेदवारले चुनाव प्रचारका क्रममा हरेक क्षेत्रमा खसी राँगा काटेर भोज गर्नुपर्ने अवस्थाले विकृति निम्तिएको धारणा व्यक्त गरे । उनले यसतर्फ सचेत हुनु पर्ने बेला आएको बताए ।