क्यूआर कोड र डिजिटल उत्पादन प्रवर्द्धनका लागि नबिल बैंक र टेवानबीच सहकार्य

८ फागुन, काठमाडौं । महिला र युवाहरूमा क्यूआर कोड र डिजिटल उत्पादनहरू प्रवद्र्धन गर्न नबिल बैंकले पर्यटन व्यवसायी महिला संघ नेपाल (टेवान) सँग साझेदारी गरेको छ ।

गण्डकी प्रदेशको राजधानी पोखरामा आयोजित एक कार्यक्रमका बीच नबिल बैंकको तर्फबाट नायब प्रमुख कार्यकारी अधिकृत सुजित कुमार शाक्य र टेवानको तर्फबाट अध्यक्ष रेनु थापाले सम्झौतापत्रमा हस्ताक्षर गरे ।

वित्तीय साक्षरता, वित्तीय पहुँच र डिजिटल वित्तीय समाधानहरू मार्फत महिलाहरूलाई पर्यटन उद्यमहरू सञ्चालन गर्न तथा डिजिटल माध्यमहरुको प्रवद्र्धन गर्ने उदेश्यले गरिएको बैंकले जनाएको छ ।

सो कार्यक्रममा बोल्दै नायब प्रमुख कार्यकारी अधिकृत शाक्यले यस सहकार्यले महिला व्यवसायीलाई डिजिटल बैंकिंङ क्षेत्रमा आबद्ध गर्दै दिगो विकास गर्नमा कोसेढुंगा साबित हुने बताए ।

त्यस्तै कार्यक्रममा टेवानका अध्यक्ष थापाले महिला व्यवसायीको प्रवर्धनमा बैंकसँग हातेमालो गर्दै सँगै अघि बढ्ने बताइन् ।

कार्यक्रममा केही महिला उद्यमीलाई नबिल क्यूआर कोड पनि हस्तान्तरण गरिएको थियो ।

कार्यक्रममा टेवान संस्थापक अध्यक्ष लक्की कार्की क्षेत्री, नबिल बैंक एसएमई तथा लघुवित्त कर्जा प्रमुख निरज कुमार बस्नेत (डनिल), दायित्व व्यवस्थापन, कर्पोरेट कम्युनिकेशन तथा सि. एस. आर. प्रमुख कृष्ण सुवेदी, नबिल बैंक गण्डकी प्रदेश प्रमुख सुर्य बहादुर रोकाको उपस्थिती थियो ।