राष्ट्र बैंकले ल्यायो नयाँ पुनरकर्जा कार्यविधि, यस्ता छन् नयाँ व्यवस्था ?

८ फागुन, काठमाडौं । नेपाल राष्ट्र बैंकले पुनर्कर्जाको कार्यविधि संशोधन गरेको छ । संशोधन कार्यविधिमा पुनरकर्जाको ब्याजदर बढाएको छ । राष्ट्र बैंकले पुनरकर्जाको ब्याजदर अधिकतम ७ प्रतिशत पुर्याएको छ ।

मौद्रिक नीतिको अर्धवार्षिक समीक्षामा घोषणा भएको उक्त व्यवस्था कार्यान्वयनका लागि राष्ट्र बैंकले पुनर्कर्जा कार्यविधि २०७७ (चौथो संशोधनसहित) जारी गरेको छ ।

नयाँ व्यवस्था अनुसार अब ऋणीले लघु, घरेलु तथा साना उद्यम र साधारण पुनर्कर्जाका लागि अधिकत ७ प्रतिशत र विशेष पुनर्कर्जामा ५ प्रतिशत ब्याजदर तिर्नुपर्नेछ । यसअघि लघु, घरेलु तथा साना उद्यम र साधारण पुनर्कर्जाका लागि अधिकत ५ प्रतिशत र विशेष पुनर्कर्जामा ३ प्रतिशत ब्याजदर तिर्नुपर्ने व्यवस्था थियो ।

पुनर्कर्जा प्रदान गर्ने बैंक तथा वित्तीय संस्थाले राष्ट्र बैंकलाई तिर्नुपर्ने ब्याजदर पनि बढाएर अधिकत ५ प्रतिशत पुर्‍याइएको छ । यसअघि बैंक तथा वित्तीय संस्थाले लघु, घरेलु तथा साना उद्यममा २ प्रतिशत, साधारण पुनर्कर्जामा ३ प्रतिशत र विशेष पुनर्कर्जामा १ प्रतिशत ब्याजदर तिर्नुपर्ने व्यवस्था थियो । एकमुष्ट रुपमा प्रदान गरिने पुनर्कर्जाको अवधि बढीमा एक वर्षको हुन्छ र यस्तो कर्जा नवीकरण हुँदैन ।

उद्यमी स्वयम् संलग्न भई सञ्चालन गरिएका उद्यम, व्यापार तथा व्यवसायमा प्रवाह भएको १५ लाखसम्मको कर्जा सुविधाको लागि प्रदान गरिने पुनर्कर्जालाई लघु, घरेलु तथा साना उद्यम पुनरकर्जा मानिन्छ । कुनै क्षेत्र विशेषलाई प्राथमिकता दिने गरी प्रदान गरिने पुनर्कर्जालाई विशेष पुनरकर्जा मानिन्छ भने दुवै समूहमा नपरेका बै‌ंकले समय समयमा तोकेका सबै कर्जालाई साधारण पुनर्कर्जा मानिन्छ ।

नेपाल राष्ट्र बैंक पुर्नकर्जा कार्यविधि २०७७ चौथो संशोधन (पूर्णपाठ)