आफुलाई परिवर्तनको नायक भन्दै प्रचण्डले भने, ‘माओवादीले हारे देश हार्छ, अरु हारे फरक पर्दैन’

८ चैत, जनकपुर ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफु मात्रै परिवर्तनको नायक भएकोले माओवादीले चुनाव हार्दा देशले पनि हार्ने बताएका छन् । आगामी निर्वाचनमा माओवादीले हारे देशले नै हार्ने जिकिर गर्दै उनले अरु पार्टीले चुनाव हार्दैमा देशलाई कुनै फरक नपर्ने बताएका छन् ।

मंगलबार जनकपुरधाममा आयोजित मधेस प्रदेशस्तरीय कार्यकर्ता प्रशिक्षण कार्यक्रमलाई सम्बोधन गर्दै उनले अरु पार्टीले हारेमा देशले नहार्ने टिप्पणी गरेका हुन् । लामो संघर्षपछि भएको राजनीतिक परिवर्तनलाई उल्ट्याउने षडयन्त्र देशी–विदेशी प्रतिक्रियावादीबाट भइरहेको प्रचण्डको भनाई छ ।

उनले परिवर्तनको नायक भएका नाताले पनि आफूहरुले आगामी चुनाव हार्न नहुने दावी गरे । यसका लागि आक्रामक ढंगले गएर प्रतिक्रियावादीविरुद्ध जनतालाई आन्दोलित र संगठित गर्नुपर्नेमा उनले जोड दिए । प्रचण्डले माओवादी विरुद्ध षड्यन्त्र गर्ने र धाँधली गर्न चाहनेलाई इँटको जवाफ पत्थरले दिनेगरी तयारी हुन कार्यकर्तालाई निर्देशन दिए ।

उनले गठबन्धन होला र खाउँला भन्ने कुरा अहिले दिमागबाट हटाइदिन पनि आग्रह गरे । उनले भने, ‘यद्यपि हामी गठबन्धन विरोधी होइन, हामीले नै गठबन्धन बनाएको हो, गठबन्धनको रक्षा गर्न धेरै ठुलो त्याग गरेका छौं ।’