इन्धन खरिद सम्झौता नवीकरण गर्न नेपाल र भारतका अधिकारीबीच वार्ता सुरु

८ चैत, काठमाडौं ।  पेट्रोलियम पदार्थ खरिद सम्झौता नवीकरण गर्न नेपाल र भारतका अधिकारीहरु बीचको तीन दिने वार्ता काठमाडौंमा सुरु भएको छ ।

नेपाल आयल निगम र भारतीय आयल कर्पोरेसन (आईओसी) का अधिकारी सम्मिलित वार्ता बिहीबारसम्म चल्ने छ । पेट्रोलियम आपूर्ति बिन्दु र यसबाट भएका फाइदा तथा बेफाइदा, मूल्य निर्धारण प्रणाली र प्राविधिक सेवा सुविधा साटासाटबारे वार्ता केन्द्रित हुनेछ ।

हरेक पाँच–पाँच वर्षमा नवीकरण हुने इन्धन खरिद सम्झौता यसअघि १ अप्रिल २०१७ मा नवीकरण भएको थियो । बैठकमा इन्धन खरिद सम्झौताको समीक्षा र भावी योजनाबारे छलफल हुनेछ ।

नेपालकोतर्फबाट बैठकको नेतृत्व निगमका कार्यकारी निर्देशक उमेश थानीले गरेका छन् । आईओसीकोतर्फबाट सन्दीप जैन नेतृत्वको ६ सदस्यीय टोली सहभागी रहेको छ ।