लोक सेवाको बढुवा सिफारिस समितिलाई पत्र, ‘एआईजीमा बढुवाको लिखित जवाफ पठाउनू’

९  चैत, काठमाडौं ।  लोक सेवा आयोगले गृह मन्त्रालयका सचिव नेतृत्वको बढुवा सिफारिस समितिलाई नेपाल प्रहरीका तीन जना डीआईजीलाई एआईजीमा बढुवाका लागि गरिएको सिफारिसको लिखित जवाफ पठाउन पत्र पठाएको छ । आयोगले डीआईजीहरुको बढुवामा उजुरी परेपछि बढुवा समितिको सचिवालयसँग लिखित जवाफ मागेको हो ।

गृह मन्त्रालयका सचिव नेतृत्वको बढुवा सिफारिश समितिले १ चैतमा डीआईजीहरु बसन्तकुमार पन्त, धीरजप्रताप सिंह र रवीन्द्र धानुकलाई एआईजीमा बढुवा गर्न सिफारिस गरेको थियो ।

उक्त सिफारिसप्रति असहमति जनाउँदै हालका प्रहरी महानिरीक्षक शैलेश थापा क्षेत्रीका ब्याची डीआईजीहरुले वरिष्ठता र कार्यक्षमताका आधारमा बढुवा सिफारिस नगरेको भन्दै लोकसेवा आयोगमा चैत ६ गते उजुरी दिएका थिए ।

बढुवा गर्ने निर्णय भएको सात दिनभित्र उजुरी दिनसकिने व्यवस्था प्रहरी नियमावलीमा छ । उजुरी प्राप्त भएपछि उजुरी सुन्ने म्याद सकिएको भोलिपल्टै बढुवा समितिमा पत्र पठाउनुपर्छ ।

उक्त पत्र प्राप्त भएको तीन दिनभित्र सम्बन्धित बढुवा समितिले उजुरी सुन्ने समितिमा आवश्यक कागजातसहित लेखी पठाउनुपर्छ । उजुरीमा उजुरी गर्ने म्याद समाप्त भएको मितिले पन्ध्र दिनभित्र टुंगो लगाइ सक्नुपर्छ ।

सिफारिसमा नपरेका ईश्वरबाबु कार्की, घनश्याम अर्याल र प्रकाशजंग कार्कीले गत सोमबार उजुरी दिएपछि लोक सेवा आयोगले बढुवा सिफारिस समितिको सचिवालयसँग त्यसको प्रतिक्रिया मागेको हो ।

बढुवाबारे उजुरी सुन्ने समितिको अध्यक्ष लोक सेवा आयोगको अध्यक्ष रहने व्यवस्था छ । यो समितिमा मुख्य सचिव र कानुन सचिव रहन्छन् । त्यसको सचिवालय लोक सेवा आयोगमा रहन्छ ।