पुर्नकर्जाको ब्याजदर बढ्यो

९ फागुन, काठमाडौं । केन्द्रीय बैंकले पुर्नकर्जाको ब्याजदर बढाएर अधिकतम ७ प्रतिशत पुर्याएको छ । मंगलबार केन्द्रीय बैंकले पुर्नकर्जा कार्यविधि २०७७ (चौथो संशोधन) जारी गर्यो । संशोधन कार्यविधिमा पुर्नकर्जाको ब्याजदर बढाएर अधिकतम ७ प्रतिशत पुर्याएको छ ।

केन्द्रीय बैंकले मौद्रिक नीतिको अर्धवार्षिक समीक्षामा घोषणा गरेको व्यवस्था कार्यान्वयनका लागि पुर्नकर्जा कार्यविधि संशोधन गरेको हो ।

नयाँ व्यवस्था अनुसार अब ऋणीले लघु, घरेलु तथा साना उद्यम र साधारण पुर्नकर्जाका लागि अधिकत ७ प्रतिशत र विशेष पुर्नकर्जामा ५ प्रतिशत ब्याजदर तिर्नुपर्नेछ । यसअघि लघु, घरेलु तथा साना उद्यम र साधारण पुर्नकर्जाका लागि अधिकत ५ प्रतिशत र विशेष पुर्नकर्जामा ३ प्रतिशत ब्याजदर तिर्नुपर्ने व्यवस्था थियो ।

पुर्नकर्जा प्रदान गर्ने बैंक तथा वित्तीय संस्थाले राष्ट्र बैंकलाई तिर्नुपर्ने ब्याजदर पनि बढाएर अधिकत ५ प्रतिशत पुर्याएको छ । यसअघि बैंक तथा वित्तीय संस्थाले लघु, घरेलु तथा साना उद्यममा २ प्रतिशत, साधारण पुर्नकर्जामा ३ प्रतिशत र विशेष पुर्नकर्जामा १ प्रतिशत ब्याजदर तिर्नुपर्ने व्यवस्था थियो ।

एकमुष्ट रुपमा प्रदान गरिने पुर्नकर्जाको अवधि बढीमा १ वर्षको हुन्छ र यस्तो कर्जा नवीकरण हुँदैन । उद्यमी स्वयं संलग्न भई सञ्चालन गरिएका उद्यम, व्यापार तथा व्यवसायमा प्रवाह भएको १५ लाख रुपैयाँसम्मको कर्जामा प्रदान गरिने पुर्नकर्जालाई लघु, घरेलु तथा साना उद्यम पुर्नकर्जा मानिने छ ।