महधिवेशनपछि पहिलो पटक सभापति देउवा र नेता कोइरालाबीच फोनमा कुराकानी

९  चैत, काठमाडौं ।  नेपाली कांग्रेसको १४ औँ महाधिवेशनमा सभापतिमा लडेका शेरबाहदुर देउवा र डा. शेखर कोइरालाबीच आज पहिलो पटक फोनमा कुराकानी भएको छ । डा. कोइरालाका निजि सचिव दिनेश थपलियाका अनुसार बुधबार (आज) सभापति देउवाले कोइरालालाई फोन गरेपछि कुराकानी भएको हो ।

स्थानीय तहको निर्वाचन नजिकिँदै गर्दा पार्टिले गर्नुपर्ने काम र निर्णयकाबारेमा दुई नेताबीच छलफल भएको थिएन । कोइरालाले सञ्चारमाध्याम र सार्वजनिक कार्यक्रमहरुमा निर्वाचन र पार्टीले आगामी दिनम लिनुपर्ने रणनीतिका विषयमा धारणा राख्दै आएका थिए ।

निर्वाचन नजिकिँदै गर्दा उम्मेदवार चयन र पार्टी संगठन विस्तार लगायतका विषयमा केहि दिन अघिदेखि देउवा र कोइरालाबीच फोन गरागरको अवस्था आएपनि संवादको अवसर भने मिलेको थिएन । गत मंसिरमा सभापतिमा भिडेर दोस्रो चरणमा देउवा विजयी भएपछि शेखरले टेलिफोनमार्फत बधाई दिएका थिए ।

त्यसपछि भेटेर बधाई दिने बताएका शेखर र सभापति देउवाबीच अहिलेसम्म व्यक्तिगत भेट भएको थिएन । बैठक–छलफलका सामूहिक भेटबाहेक शेरबहादुर–शेखरबीच व्यक्तिगत रूपमा टेलिफोन वा प्रत्यक्ष संवाद समेत यसअघि भएको थिएन ।

बुधबार बिहान सभापति देउवाले शेखरलाई टेलिफोनमा सम्पर्क गरेका हुन् । दुई नेताबीच पार्टी सञ्चालनका विषयमा कुराकानी भएको बताइएको छ । पोनमा कोइरालाले पार्टी सञ्चालन, भातृसंस्थाको तदर्थ समिति र पार्टी मापदण्डका आधारमा न्यायपूर्ण सञ्चालन गर्नुपर्ने विषयमा कुरा राखेका थिए ।

थपलियाका अनुसार संसदीय समिति गठन र पार्टीका अरू गतिविधि सञ्चालनका विषयमा पनि कुराकानी भएको थियो । देउवाले सबैलाई मिलाएर अघि बढन आफु तयार रहेको र यसका लागि सहयोग गर्न आग्रह गरेका थिए ।