एमाले केन्द्रीय कमिटीमा प्रदेश अध्यक्षहरुले गरे गठबन्धन गर्दा हुने घाटा र नाफाको रिपोर्ट

९  चैत, काठमाडौं ।  नेकपा एमाले केन्द्रीय कमिटीको जारी बैठकमा सातै प्रदेशका अध्यक्षहरूको रिपोर्टिङ सकिएको छ । प्रदेश अध्यक्षहरूले आगामी निर्वाचनमा एमाले पहिलो शक्ति बन्ने बैठकमा रिपोर्टिङ सुनाएका थिए ।

एमालेका प्रदेश अध्यक्षहरुले आसन्न स्थानीय तह निर्वाचनमा प्रदेश अनुसार आफुले जित्न सक्ने सिटको प्रक्षेपण गरेका छन् । केन्द्रीय कमिटीको तेस्रो बैठकमा रिपोर्टिङ प्रस्तुत गर्दै कर्णाली प्रदेश अध्यक्ष विनोदकुमार शाहले आउँदो वैशाख ३० गते हुने स्थानीय तह निर्वाचनमा २९ स्थानीय तह जित्ने दाबी गरे । तर, एमाले एक्लै लड्नुपर्नेमा उनले जोड दिए ।

यसअघि, ०७४ को स्थानीय तह निर्वाचनमा एमालेले २९ सिट जितेको थियो । अध्यक्ष शाहले गठनबन्धन गरेर गए १५ स्थानीय तह जित्ने बताए । कर्णाली प्रदेशमा ७९ स्थानीय तह छन् ।

यस्तै लुम्बिनी प्रदेशमा एमालेले आसन्न स्थानीय तह निर्वाचनमा गठबन्धन गर्न नहुने प्रक्षेपण गरेको छ । पार्टीको काठमाडौंमा जारी केन्द्रीय कमिटीको तेस्रो बैठकमा प्रदेश अध्यक्ष राधाकृष्ण कँडेलले रिपोर्टिङ गर्दै निर्वाचनमा अरू पार्टीसित तालमेल गर्न उपयुक्त नहुने बताए । कँडेलका अनुसार गठबन्धन गरे पार्टीलाई प्रदेशमा २४ सिट घाटा हुनेछ ।

उनका अनुसार १०९ स्थानीय तह भएको लुम्बिनीमा एमाले एक्लै लडे ६५ स्थानीय तहमा जित हासिल गर्न समस्या छैन । तर, गठबन्धन गरेर गएमा ४१ सिट मात्र जित्न सकिने अवस्था छ ।

यता, गण्डकीमा भने १२ स्थानीय तह गुमाउने एमालेको प्रक्षेपण छ । उसले आसन्न स्थानीय तह निर्वाचनमा गण्डकी प्रदेशमा सिट संख्या घट्ने प्रक्षेपण गरेको छ ।

प्रदेश अध्यक्ष नवराज शर्माले रिपोर्टिङ गर्दै १२ स्थानीय तह गुम्न सक्ने बताएका हुन् । ०७४ को निर्वाचनमा एमाले ३९ स्थानीय तहमा विजयी भएको थियो । अहिले २७ स्थानीय तह जित्ने अध्यक्ष शर्माले बैठकमा रिपोर्टिङ गरे ।