एमालेभन्दा कांग्रेससँग चुनावी तालमेल हुन सक्छः नेता झा

९ चैत, काठमाडों । लोकतान्त्रिक समाजवादी पार्टी (लोसपा) का कार्यकारिणी सदस्य केशव झाले स्थानीय तहको चुनावमा कांग्रेससँग गठबन्धन गर्ने तयारी भइरहेको बताएका छन् ।

सामुदायिक रेडियो प्रसारक संघ (अकोराब) को १६औँ वार्षिक साधारणसभा र सामुदायिक रेडियो राष्ट्रिय सम्मेलनमा झाले चुनावी गठवन्धनबारे एमालेसँग औपचारिक अनौपचारिक कुनै प्रकारको संवाद नभएको बताए ।

कांग्रेससँग भने चुनावी गठबन्धन र सरकारमा सहभागिताको विषयमा दुईपटक छलफल भएको झाको भनाइ छ । स्थानीय तह राजनीतिक दलका उम्मेदवार हुने भन्दा पनि निर्दलीय व्यवस्था गर्नुपर्ने उनको भनाइ छ ।

‘स्थानीय तहमा चुनावी गठबन्धनको आवश्यकता छैन किनकी गठबन्धन राजनीतिले मुलुकमा अस्थिरता निम्त्याउँछ तर यदि सत्ता गठबन्धन जारी रहने हो भने हामी पनि गठबनधनमा जानुपर्ने बाध्यता हुन्छ,’ उनले भने ।

झाले आफूहरूसँग एक्लै चुनावमा भाग लिने, एमालेसँग चुनावी तालमेल गर्ने र सत्ता गठवन्धनसँगै तालमेल गर्ने तीन विकल्प रहेको बताए ।