नेप्से २६३० विन्दुमा झर्यो, दुई कम्पनीको शेयरमा सर्किट

९ फागुन, काठमाडौं । बुधबार नेप्सेमा दोहोरो अंकले गिरावट आएको छ । २६५१ विन्दुमा खुलेको बजार २० दशमलव ३४ अंकले घटेर २६३० विन्दुमा झरेको हो ।

यस दिन सेन्सेटिभ इण्डेक्स ४.२२ अंक घटेको छ भने फ्लोट इण्डेक्स १.४७ अंक र सेन्सेटिभ फ्लोट इण्डेक्स १.५६ अंक घटेको छ।

यस दिन नेप्से ओरालो लागेसँगै कारोबार रकम पनि घटेको छ। अघिल्लो कारोबार दिन साढे २ अर्बको शेयर खरिदबिक्री भएको नेप्सेमा यस दिन २२६ स्टकको २९ हजार ६७८ पटकको कारोबारमा २ अर्ब ४ करोड ६३ लाख ५२ हजार रुपैयाँ बराबरको ३९ लाख ८५ हजार कित्ता शेयर खरिदबिक्री भएको छ।

बुधबार ४६ स्टकको मूल्य बढेको छ। जसमध्ये दुई स्टकको मूल्य सकारात्मक सर्किट लेभलमा कारोबार भएको छ। यस दिन राष्ट्र उत्थान लघुवित्त र इमर्जिङ्ग नेपाल लघुवित्तको शेयरमूल्य सकारात्मक सर्किट लेभलमा कारोबार भएको हो। यस दिन राष्ट्र उत्थान लघुवित्तको शेयरमूल्य ६७ रुपैयाँ ७० पैसा बढेर ७४५ रुपैयाँमा अन्तिम कारोबार भएको छ भने इमर्जिङ्ग नेपालको ६२ रुपैयाँ ८० पैसा बढेर ६९१ रुपैयाँ ६० पैसामा अन्तिम कारोबार भएको छ।

यस दिन १६५ स्टकको मूल्य घटेको छ तर गिरावट दर भने कम रहेको छ। यस दिन बुद्धभुमि नेपाल हाइड्रोपावर, खानीखोला हाइड्रोपावर, जोशी हाइड्रोपावर, पाँचथर पावर कम्पनी र सेन्ट्रल फाइनान्सको शेयरमूल्य ३ प्रतिशतभन्दा बढी घटेका छन्।

कारोबार रकमका आधारमा यस दिन एनआईसी एशिया बैंक शीर्ष स्थानमा रहेको छ। सो बैंकको यस दिन करिब साढे ८ करोडको शेयर खरिदबिक्री भएको छ। त्यसैगरी, यस दिन जीवन विकास लघुवित्त र अरुण भ्याली हाइड्रोपावरको ८ करोडभन्दा बढीको शेयर कारोबार भएको छ।

बुधबार १३ उपसमूहमध्ये २ उपसमूहको परिसूचक बढेको छ भने बाँकी ११ उपसमूहको परिसूचक घटेको छ। यस दिन व्यापार उपसमूहको परिसूचक ०.५० प्रतिशत बढेको छ भने म्युचुअल फण्डको ०.२५ प्रतिशत बढेको छ। कारोबारमा आएको विकास बैंक, वित्त, जलविद्युत, अन्य र उत्पादन तथा प्रशोधन उपसमूहको परिसूचक १ प्रतिशतभन्दा बढी घटेका छन्।