एसएसपीको नेतृत्वमा लेटाङ घटनाको छानबिन गर्न समिति गठन

९  चैत,  मोरङ ।  मोरङको लेटाङमा महिला प्रहरी जवानको मृत्यु भएको घटनामा छानबिन गर्न प्रहरी वरिष्ठ उपरीक्षक (एसएसपी)को नेतृत्वमा समिति गठन गरिएको छ । बुधबार १ नम्बर प्रदेश प्रहरी कार्यालयले एसएसपी राजेन्द्रप्रसाद चौधरीको नेतृत्वमा छानबिन समिति गठन भएको हो ।

उनको नेतृत्वमा पाँच सदस्यीय समिति गठन गरेको कार्यालयका प्रवक्ता प्रहरी उपरीक्षक (एसपी) नवीनराज राईले जानकारी दिए । समितिले घटना कसरी भयो र के कस्तो कमजोरी भए भन्नेबारेमा अनुसन्धान गर्नेछ । छानबिनको प्रतिवेदन बुझाउन समय सीमा भने तोकिएको छैन ।

गत आइतबार लेटाङ नगरपालिका–१ स्थित शिक्षा माविमा प्रहरी र स्थानीयबीच झडप भएको थियो । चैत ४ गते होलीका दिन एक शिक्षक छात्राको घरमा पुगेका थिए। घरमा पुग्ने बित्तिकै उनले छात्रासँग पानी मागेका थिए । पानी ल्याएर दिने क्रममा ती शिक्षकले छात्रामाथि दुर्व्यवहार गरेको आरोप छ ।