गठबन्धनको निर्णय क्षेत्राधिकारभित्रका समितिले गर्नुपर्छ, सभापति र केन्द्रीय समितिले होइन

९  फागुन, काठमाडौं ।  नेपाली कांग्रेस कोइराला समूहका नेताहरुको छलफलले आगामी निर्वाचनमा अरु दलसँग गठबन्धन गर्ने कि नगर्ने भन्ने विषयको जिम्मा विधान अनुसारका समितिलाई दिनुपर्ने निष्कर्स निकालेको छ ।

समूहको भेलाले कांग्रेस सभापति एवं प्रधानमन्त्री शेरबहादुर देउवाले चाहँदैमा मात्रै स्थानीय चुनावमा गठबन्धन हुन नसक्ने निष्कर्षसहित विधानअनुसार बन्ने समितिलाई गठबन्धनको अधिकार दिनुपर्ने बताएको छ ।

बुधबार काठमाडौंमा बसेको शेखर कोइराला समूहको बैठकले पार्टीको विधान अनुसार चार तहको समिति रहेको र सम्बन्धित समितिलाई नै यसबारे निर्णय गर्न दिनइनु उचित हुने निष्कर्ष निकालेको हो ।

सभापति देउवाले चाहेर र केन्द्रीय समितिले चाहेर मात्रै पनि यसबारे निर्णयमा पुग्न नसकिने निष्कर्ष रहेको बैठकमा सहभागी एक नेताले बताए ।

पार्टीको विधान अनुसार महानगरको मेयर र उपमेयर बाहेक अन्य स्थानीय तहबारे निर्णय गर्ने क्षेत्राधिकार प्रदेश, जिल्ला र प्रतिनिधि सभा क्षेत्रीय समितिलाई दिएका कारण क्षेत्राधिकार बाहिर गएर निर्णय गर्न नमिल्ने उक्त समूहको ठहर रहेको छ । स्थानीय तहमा केन्द्रबाट गठबन्धन गरेर जान सकिने सम्भावना नै नरहेको उक्त समूहको ठहर छ ।