कम्युष्टिहरुले फैलाएको भ्रम चिरेर कांग्रेसले चुनाव जित्नुपर्छः वरिष्ठ नेता पौडेल

१० चैत, दमौली । नेपाली कांग्रेसका वरिष्ठ नेता रामचन्द्र पौडेलले कम्युनिष्टहरुले कांग्रेसका बारेमा फैलाएको भ्रम चिरेर चुनावी प्रचार गर्न कार्यकर्ताहरुलाई निर्देशन दिएका छन् । उनले कांग्रेसले गरेका कामका बारेमा जनतालाई जानकारी गराएर आगामी निर्वाचनमा मत माग्नुपर्ने बताएका छन् ।

कांग्रेस व्यास नगरपालिका–२ ले बिहीबार दमौलीमा आयोजना गरेको भेलालाई सम्बोधन गर्दै उनले कांग्रेसले सरकारको नेतृत्व गर्दा गरेका कामका बारेमा जनतालाई जानकारी गराउनुपर्ने बताए ।

उनले भने, ’विपक्षी दलहरूले जनतालाई भ्रममा पार्ने कोसिस गरिरहेका छन् । त्यस्ता भ्रमलाई कांग्रेसले चिर्न सक्नुपर्छ’, कांग्रेसका बारेमा जनतालाई बुझाउन हरेक नेता तथा कार्यकर्ताले अध्ययन, चिन्तन र मनन गर्नुपर्ने वरिष्ठ नेता पौडेलको भनाइ थियो ।

उनले व्यास नगरपालिकालाई प्रकृतिमैत्री बनाउने चुनौती थपिएको बताए । नगरपालिकाभित्र बनेका संरचनाले नगर क्षेत्र साँघुरिँदै गएकामा उनले चिन्ता व्यक्त गरे ।