भारतसँग भोलीदेखि प्रतियुनिट ३८ रुपैयाँमा विजुली किन्दै प्राधिकरण

१०  चैत, काठमाडौं ।  औद्योगिक क्षेत्रमा अभाव हुने भएपछि नेपाल विद्युत प्राधिकरणले भोलीदेखि भारतसँग प्रतियुनिट ३८ रुपैयाँमा विजुली खरिद गर्ने निर्णय गरेको छ ।

भारतीय बजारमा विजुलीको भाउ अत्यधिक बढेको भन्दै भारतले नेपाललाई दिँदै आएको विजुलीमा कटौती गरेपछि प्राधिकरणले महँगौमा खरिद गर्न लागेको हो ।

नेपाल विद्युत प्राधिकरणले बिहीबार पत्रकार सम्मेलन गर्दै भारतसँग अहिलेसम्मकै उच्च मूल्यमा विजुली खरिद गर्ने सम्झौता भएको जानकारी दिएको छ ।

भारतमा विजुली महंगो भएको भन्दै प्राधिकरणले नकिन्दा नेपालका कतिपय औद्योगिक क्षेत्रमा विजुली अभाव भएपछि भारतीय बजारबाट महंगोमै भए पनि विजुली किन्ने गरी सम्झौता गरेको हो ।

प्राधिकरणकाअनुसार ३८ रुपैयाँ प्रतियुनिट सात हजार मेगावाट आवर बिजुली खरिद गरिनेछ । नेपालले केही दिनअघिसम्म ८ रुपैयाँ भारुमा विजुली किनेको थियो ।

भारतमा ऊर्जाको मूल्य एक्कासी बढेको र सस्तो मूल्यमा प्रस्ताव गर्दा विजुली नै नपाएको हुनाले केही दिन नेपालमा विजुली अभाव भएको हो । अहिले फुल रेटमा बिड गरेकाले अब विजुलीको समस्या नहुने प्रधिकरणले जनाएको छ ।