बिहीबार पनि घट्यो नेप्से, तीन कम्पनीको शेयरमा सकारात्मक सर्किट

१० फागुन, काठमाडौं । बिहीबार नेप्सेमा दोहोरो अंकले गिरावट आएको छ । २६३० विन्दुमा खुलेको बजार १६ दशमलव ६९ अंकले घटेर २६१३ विन्दुमा झरेको हो ।

यस दिन सेन्सेटिभ इण्डेक्स ४.८८ अंक घटेको छ भने फ्लोट इण्डेक्स १.२६ अंक र सेन्सेटिभ फ्लोट इण्डेक्स १.८९ अंक घटेको छ।

यस दिन नेप्से ओरालो लागेसँगै कारोबार रकम भने बढेको छ। अघिल्लो कारोबार दिन २ अर्ब ४ करोडको शेयर खरिदबिक्री भएको नेप्सेमा यस दिन २२४ स्टकको ४५ हजार ७६ पटकको कारोबारमा ३ अर्ब २४ करोड रुपैयाँ कारोबार भएको छ।

बिहीबार ४९ स्टकको मूल्य बढेको छ। जसमध्ये ३ स्टकको मूल्य सकारात्मक सर्किट लेभलमा कारोबार भएको छ। यस दिन राष्ट्र उत्थान लघुवित्त, युनाइटेड इदी मर्दी र इमर्जिङ्ग नेपालको शेयरमूल्य सकारात्मक सर्किट लेभलमा कारोबार भएको हो। यस दिन इमर्जिङ्ग नेपालको शेयरमूल्य ६९ रुपैयाँ १० पैसा बढेर ७६० रुपैयाँमा अन्तिम कारोबार भएको छ भने राष्ट्र उत्थानको ७४ रुपैयाँले बढेर ८१९ रुपैयाँ ६० पैसामा अन्तिम कारोबार भएको छ।

यस दिन १४१ स्टकको मूल्य घटेको छ तर गिरावट दर भने कम रहेको छ। यस दिन नेपाल फाइनान्स, सामलिङ हाइड्रोपावर, माउन्टेन, मैलुखोला र सिनर्जी हाइड्रोको शेयरमूल्य करिब ४ प्रतिशतभन्दा बढी घटेका छन्।

कारोबार रकमका आधारमा यस दिन जीवन विकास लघुवित्त शीर्ष स्थानमा रहेको छ। सो लघुवित्तको यस दिन करिब ३० करोडको शेयर खरिदबिक्री भएको छ। त्यसैगरी, यस दिन नेपाल टेलिकमको २३ करोडभन्दा बढीको शेयर कारोबार भएको छ।