संस्थापनइतर पक्षका जिल्ला सभापतिहरुलाई वरिष्ठ नेता पौडेलले किन बोलाए काठमाडौं ?

१०  चैत,  काठमाडौं ।  नेपाली कांग्रेसको १४ औँ महाधिवेशनपछि गुटगत राजनीतिमा निस्क्रिय देखिएका वरिष्ठ नेता रामचन्द्र पौडेलले सस्थापनइतर पक्षका जिल्ला सभापतिहरुलाई छलफलका लागि काठमाडौं बोलाएका छन् । शुक्रबार विहान ९ बजे जम्मा हुनेगरी सभापतिहरुको भेला बोलाइएको हो ।

शुक्रबार दिउँसो कांग्रेस केन्द्रीय समितिको बैठक पनि बस्दैछ । केन्द्रीय समितिको बैठक अघि पौडेलले सस्थापनइतर पक्षका सभापतिहरुको भेला बोलाएका हुन । भेलामा आगामी निर्वाचन र उम्मेदवार छनोटका विषयमा छलफल हुने बताइएको छ ।

संस्थापनइतर पक्षका नेता पौडेल सभापतिमा आफ्नै गुटका नेताहरूले अघि नसारेपछि महाधिवेशनको प्रक्रियामा सहभागी नहुने बताएर घरमै बसेका थिए । त्यसयता संस्थापनइतर पक्षको भेलामा पौडेललाई कुनै पनि कार्यक्रममा बोलाउन समेत छाडिएको छ ।