परामर्श नगरेको भन्दै कोइराला समूहले बोलायो नेविसंघ र तरुण दलको राष्ट्रिय भेला

१० चैत, काठमाडौं ।  नेपाली कांग्रेसका सभापति शेरबहादुर देउवाले आफुहरुसँग परामर्श नगरी अगाडी बढ्न खोजेको भन्दै संस्थापनइतर समूहले नेपाल विद्यार्थी संघ र तरुण दलमा आवद्ध आफ्नो पक्षको राष्ट्रिय भेला बोलाएको छ ।

पार्टी सभापति शेरबहादुर देउवाले परामर्श नगरी नेविसंघ र र तरुण दलको अध्यक्ष चयन गरेपछि डा.शेखर कोइरालाले नेतृत्व गरेको संस्थापनइतर समूहले आफू पक्षका नेताहरुको भेला बोलाएको नेता गुरुराज घिमिरेले जानकारी दिए ।

उनले तीन दिनभित्र नेविसंघ र तरुण दलको संयुक्त रुपमा राष्ट्रिय भेला गर्ने भनिएको र यसमा अरु जोडिन आए भने ढोका खुला रहेको बताए । कार्यसम्पादन समितिले भ्रातृ संस्थाको नेतृत्व सभापतिले आपसी परामर्शमा चयन गर्ने निर्णय भए पनि देउवाले त्यसलाई लत्याएको शेखर पक्षको आरोप छ ।

नेता घिमिरेले पार्टीका कुनै पनि निर्णय नेताहरु बीचको समझदारीबाट हुनुपर्छ भन्दै पार्टीभित्र एकाधिकार स्वेच्छाचारिता देखिन थालेको बताए । नेविसंघको अध्यक्ष नियुक्तिको विरोधमा शेखर पक्षका कार्यकर्ताले विरोध प्रदर्शन पनि गर्ने भएका छन् ।