चुनावमा जाने राजनीतिक प्रस्ताव लिएर बैठक डाकेका विप्लव आफै अल्पमतमा

११ चैत, काठमाडौं ।  नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) मा चुनावमा नजानेहरूको स्पष्ट बहुमत देखिएपछि महासचिव चन्द अल्पमतमा परेका छन् । चुनावलाई उपयोग गर्नुपर्ने नेकपा महासचिव विप्लवको प्रस्ताव पार्टीभित्र अल्पमतमा परेको छ ।

गत शुक्रबारदेखि कपिलवस्तुमा जारी केन्द्रीय कमिटी बैठकमा विप्लवले चुनावलाई उपयोग गर्ने भने पनि त्यसको मोडालिटीबारे खुला छलफल गर्ने प्रस्ताव गरेका थिए । बिहीबारसम्म सबै केन्द्रीय सदस्यहरूले आफ्ना धारणा राखिसकेका छन् । अब महासचिव विप्लवले मात्रै बोल्न बाँकी छ ।

अहिलेसम्म चुनावमा जानु हुँदैन भन्ने पक्षमा ६६ जनाले केन्द्रीय कमिटी धारणा राखेका छन् । केन्द्रीय कमिटी बैठक अझै १÷२ दिन बस्ने भएको छ । विप्लवको प्रस्ताव असफल भएपछिको पार्टीको रणनीति के हुने भन्ने छलफलसमेत गर्न जरूरी रहेको बताइएको छ ।

२०६९ सालमा तत्कालीन एकीकृत माओवादीसँग विभाजन गर्दा मोहन वैद्यलाई साथ दिएका विप्लवले त्यसपछि २०७१ मा वैद्यसँग विद्रोह गरेका थिए । केही समय सशस्त्र क्रान्ति गर्ने भनेर भूमिगत भए पनि २०७७ फागुनमा केपी शर्मा ओली नेतृत्वको सरकारसँग वार्ता गरेर उनी शान्तिपूर्ण राजनीतिमा आएका हुन् ।
नेकपाको ५ सदस्यीय सचिवालयमा विप्लव र प्रकाणड एकातिर छन् भने हेमन्तप्रकाश ओली चुनावको विपक्षमा थिए। एक केन्द्रीय सदस्यका अनुसार सन्तोष बुढा मगर समेत निर्वाचनको विपक्षमा छन् ।