बूढानीलकण्ठमा दाउ प्रहार गरी श्रीमतीको हत्या, फरार श्रीमान् पक्राउ

११ चैत, काठमाडौं ।  बूढानीलकण्ठ नगरपालिका–१३, चुनिखेलमा एक जनाले धारिलो हतियारको प्रयोग गरी श्रीमतीको हत्या गरेका छन् ।

महानगरीय प्रहरी परिसर, काठमाडौंका अनुसार उदयपुर घर भइ चुनिखेलमा बस्दै आएका २१ वर्षीय भक्तबहादुर थापाले श्रीमती २४ वर्षीय लक्ष्मी तामाङ (थापा) को हत्या गरेका हुन् ।

उनलाई दाउले प्रहार गरेर हत्या गरेको पाइएको छ । गएराति पौने १२ बजे सामान्य घरायसी विवादमा घटना भएको हो । गम्भीर घाइतेलाई तकाल उद्दार गरी स्थानीय अस्पतालमा भर्ना गरिएको थियो । तर चिकित्सकहरुले उनलाई मृत घोषित गरेको प्रहरीले जनाएको छ ।

घटनालगत्तै फरार रहेका भक्तलाई पक्राउ गरेर महानगरीय प्रहरी प्रभाग, बूढानिलकण्ठमा राखिएको प्रहरीले जनाएको छ ।