प्रचण्डले भरतपुर पुगेर भने, ‘रेणुको नेतृत्वले महानगरमा विकासै विकास’

११ चैत, चितवन । नेकपा माओवादी केन्द्रका अध्यक्ष पुष्पकमल दाहाल प्रचण्डले भरतपुर महानगरपालिकाको विकासले देशलाई मात्र नभएर विदेशीलाई समेत छक्क पारेको बताएका छ । उनले विकासका दृष्टिले सिंगो देशलाई नै यो महानगरले सन्देश दिएको दावी गरेका छन् ।

शुक्रबार भरतपुर महानगरपालिकाको प्रकाशकीय भवनको शिलान्याश गर्दै प्रचण्डले देशको मध्य भागमा रहेको यो महानगरले सिंगो देशलाई सन्देश दिई रहेको र यसलाई विदेशीहरुले पनि महत्वका साथ नियालिरहेकोको बताए ।

अहिले भरतपुर महानगरमा उनकै छोरी रेणु दाहाल मेयर छिन् । भरतपुर महानगरपालिकाको देशभरी नै एउटा पहिचान बनेको र देशबाहिर पनि भतरपुरको विकास मोडेल निकै चर्चित भएको उनको भनाई छ । हाम्रा छिमेकीदेखि धेरै टाढा–टाढासम्मका हाम्रा मित्रहरुले पनि भरतपुरलाई एउटा विशिष्ट महानगरका रुपमा हेरेको प्रचण्डले बताए ।

यसो हुनुमा महानगरकी मेयरको दृढ इच्छाशक्ति र सकरात्मक सोच कारक रहेको प्रचण्डको दावी छ । ‘मैले भरतपुर महानगरपालिकाको मेयर दिमागमा जति बेला पनि महानगरपालिका र त्यो परिवारप्रति जहिले पनि सकरात्मक सोच मात्रै भेटेँ,’ उनले भने, ‘यहाँका वडाध्यक्षहरु धेरै नेपाली कांग्रेसका छन् ।
उहाँहरु असाध्यै राम्रा छन् भन्ने जहिले पनि । एमालेकासँग पनि त्यस्तै । सहज अन्तरक्रिया गर्न सक्ने । दृढ इच्छाशक्ति र सकरात्मक सोचका कारणले पनि अहिले भरतपुर महानगरको विकास प्रक्रियाले तिब्रता पाएको छ। ’

जनप्रतिनिधिको हैसियतले आफूले पनि भूमिका खेलेको प्रचण्डको भनाइ छ । उनले भने, ‘चितवनकै जनप्रतिनिधिको हैसियतले यहाँ विकासमा काम अगाडि बढाउनका निम्ति मेरो ठाउँबाट राष्ट्रिय जिम्मेवारी महशुस गर्दै सिङ्गै राष्ट्रलाई पनि निजी, सहकारी र सार्वजनिकको साझेदारीको मान्यता जो स्थापित गर्न खोजेका छौं। त्यसको एउटा चितवन बन्नुपर्छ, भरतपुर बन्नुपर्छ भनेर नै आयोजनाहरु अगाडि बढेका हुन् ।’