देउवासँग सत्ता गठबन्धनमा प्रदेश सरकारबारे भएको सहमति सोध्न लुम्बिनी कांग्रेस काठमाडौं आउँदै

१२ चैत, बुटवल ।  नेपाली कांग्रेसका सभापति शेरबहादुर देउवाको नेतृत्वमा संघीय सरकार गठन हुँदा गठबन्धन दलहरुसँग भएको सहमतिअनुसार लुम्बिनी प्रदेश सरकारको नेतृत्व परिवर्तन नभएको भन्दै यसबारे छलफल गर्न लुम्बिनी कांग्रेसले काठमाडौं आउँदैछ ।
आलोपालो गर्ने भद्र सहमति कार्यान्वयन गर्ने हो वा होइन र यो विषयमा कस्तो सहमति भएको थियो भनेर प्रधानमन्त्री एवं नेपाली कांग्रेसका सभापति देउवासँग सोध्नकै लागि लुम्बिनी कांग्रेसको एक टोली काठमाडौं आउन लागेको हो ।

प्रदेश सभा संसदीय दलको वैठकले सर्वसम्मत निर्णय गरी कांग्रेसले नेतृत्व पाउनुपर्ने भद्र सहमति कार्यान्वयनका लागि पार्टी सभापति शेरबहादुर देउवासमक्ष डेलिगेसन जाने निर्णय भएको एक नेताले बताए ।

गत साउन २७ मा शंकर पोखरल नेतृत्वको सरकार विस्थापित गरेर माओवादी केन्द्रका सांसद कुलप्रसाद केसीलाई मुख्यमन्त्री बनाउँदा नेपाली कांग्रेससँग ८÷८ महिना आलोपालो सरकारको नेतृत्व गर्ने भद्र सहमति भएको थियो ।

सहमति अनुसार सरकारको नेतृत्व परिवर्तन नभएपछि कांग्रेस संसदीय दलको वैठकले नेतृत्व लिन केन्द्रीय नेतृत्वसँग अनुरोध गर्ने निर्णय गरेको नेपाली कांग्रेसका प्रमुख सचेतक फखरुद्दिन खानले बताए । पूर्वसहमति कार्यान्वयनका लागि पहलकदमी लिन पार्टी सभापति शेरबहादुर देउवासंग अनुरोध गर्ने निर्णय भएकाले देउवालाई भेट्न वीरेन्द्र कनौडिया आइतबार काठमाडौं आँउदैछन् ।

नेपाली कांग्रेस संसदीय दलका नेता वीरेन्द्र कनौडियाले गठबन्धन सरकार बन्दा माओवादी केन्द्रले फागुन २ गते जनयुद्ध दिवस मनाएर सत्ता हस्तान्तरण गर्ने सहमति जनाए पनि कार्यान्वयन नभएको भन्दै यो विषयमा पार्टि सभापतिसँग सोध्ने बताएका छन् ।