देशकाे अर्थतन्त्रलाई आत्मनिर्भर बनाउन विकास आधुनिकीकरणमा जानुपर्छः ओली

१२ चैत, काठमाडौं ।  नेकपा एमालेका अध्यक्ष केपी शर्मा ओलीले देशको अर्थतन्त्र दयनीय अवस्थामा पुगेको टिप्पणी गर्दै परम्परागत उत्पादनको प्रक्रियालाई आधुनिकीकरण तर्फ नलगेसम्म देशलाई अर्थतन्त्रमा आत्मनिर्भर बनाउन नसकिने बताएका छन् ।

उनले आफुले देशको विकास र अर्थतन्त्रलाई नयाँ ढंगबाट अगाडि बढाउन चाहेपनि पुरातन सोचमा भएकाहरुको असहयोग र राजनीतिक खिचातानीका कारण लयमा आइसकेको विकास पनि अवरुद्ध भएको बताए ।

ओलीले देशको पुँजी परिचालन गरी आत्मनिर्भर अर्थतन्त्र बनाउनु पर्नेमा अहिलेको सरकार उल्टो गतिमा गएको भन्दै देशलाई उद्योग व्यवसायतर्फ लागे मात्रै आत्मनिर्भर अर्थतन्त्र हुने दावी गरे ।

एमालेनिकट उद्योग व्यवसायीको विशेष जिल्ला कमिटी काठमाडौ अधिवेशनलाई सम्बोधन गर्दै उनले उद्योग व्यवसायलाई पनि आधुनिकीकरणतर्फ लानुपर्ने धारणा राखे ।

ओेलीले भने, ‘देशलाई आधुनिकीकरणतर्फ लाने कुरा उत्पादनमा नविनता नयाँ नयाँ उत्पादनमा प्रविधिको प्रयोग, नयाँ प्रकारका सुविधा, नयाँ प्रकारका उपभोग नै आधुनिकता हो । उत्पादनका क्षेत्रलाई आधुनिक बनाउनु पर्यो र परम्परागत उत्पादन प्रक्रियामा पनि आधुनिकता जोड्नु प¥यो । विकास पनि एक प्रकारको आधुनिकीकरणनै हो ।’

उनले भौतिक र सामाजिक पूर्वाधारमा लगानी बढाउनुपर्नेमा जोड दिँदै कृषिमा आधुनिकीकरण नगरी उत्पादकत्व नबढ्ने र जसले गर्दा आयात प्रतिस्थापन नहुने बताए ।