ओलीको नेतृत्वमा भएको गुट एमाले हैन, दक्षिणपन्थी अवसरवादको गुट होः झलनाथ खनाल

१२ चैत, काठमाडौं । नेकपा (एकीकृत समाजवादी) का सम्मानित नेता एवं पूर्व प्रधानमन्त्री झलनाथ खनालले केपी शर्मा ओली नेतृत्वमा रहेको गुट एमाले नभएर दक्षिणपन्थी अवसरवादको गुट भएको बताएका छन् । उनले माओवादीसँगको एकीकरणपछि नेकपा एमाले नरहेको दाबी गरेका छन् ।

शनिबार काठमाडौंमा आयोजित समाजवादी प्रेस संगठन नेपालको केन्द्रीय कमिटीको प्रथम विस्तारित बैठकमा बोल्दै खनालले एमालेको इतिहास सकिएको बताए । एमाले उहिले थियो, त्यो ओलीले सिध्याए अब यो दशमा एमाले भन्ने पार्टी नै नभएको खनालले बताए ।

उनले एमाले भनेको इतिहास भएको भन्दै अहिले एमालेका अध्यक्ष केपी शर्मा ओलीको नेतृत्वमा रहेको पार्टी दक्षिणपन्थी अवसरवादको गुट भएको आरोप लगाए । खनालले नयाँ गुटले अहिले पनि देशभर नेकपा एमाले हौँ भनेर भ्रम छर्ने काम गरेको तर त्यो भ्रममा अब जनता नपर्ने बताए ।

एमालेमा रहेका नेता तथा कार्यकर्तालाई जनताको साथ दिइरहेको पार्टी नेकपा एकीकृत समाजवादीमा आउन पनि उनले आग्रह गरे । आगामी चुनावमा एमालेले दुई तिहाई नभएर दुई तीन सिट मात्र ल्याउने उनको दाबी छ ।

खनालले भने,‘ हामीले लामो समय लगाएर बनाएको नेकपा जुन थियो त्यो नवौँ महाधिवेशनसम्म लगातार जारी रह्यो । त्यसले महत्वपूर्ण ऐतिहासिक भूमिका पनि खेल्यो । तर, निर्वाचनको पूर्वघडि तिरको सेरोफेरोमा हामीले त्यो पार्टी र नेकपा माओवादी केन्द्रसँग एकीकरण ग¥यौं । एकीकरण गरेपछि त्यतिबेला त नेकपा एमाले त सिध्यो । त्यो त इतिहासको वस्तु भयो ।’